Вось i надышло доўгачаканае лета — час адпачынку для дарослых, канiкулаў — для дзяцей. Але цудоўныя днi, напоўненыя цiкавымi прыгодамi, часцяком прыносяць сумныя навiны пра ДТЗ. І гэта паўтараецца з года ў год.
Праблема гiбелi i траўмiравання дзяцей на дарогах робiцца асаблiва актуальнай менавiта ў летнi сезон. Пасля напружанага навучальнага года дзецi робяцца бесклапотнымi, расслабляюцца. Вольны час яны iмкнуцца праводзiць на вулiцы, а бацькi тым часам занятыя на рабоце. І тады здараецца бяда. Нярэдка нават знаёмы пераход, па якiм дзецi столькi разоў хадзiлi ў школу, становiцца для iх небяспечным выпрабаваннем.
Некалькi летнiх дзён ужо адкрылi лiк сумнай статыстыцы. Так, у Мастах 57-гадовы вадзiцель наехаў на сваiм аўто на двух хлопчыкаў, 10 i 11 гадоў, калi яны перасякалi вулiцу па нерэгуляваным пешаходным пераходзе. У вынiку старэйшы хлопчык быў шпiталiзаваны. А ў Гомелi «вызначыўся» вадзiцель маршрутнага таксi, таксама сталага веку. Ён сутыкнуўся з пасажырскiм аўтобусам, якi спынiўся перад нерэгуляваным пераходам, каб прапусцiць пешаходаў. У вынiку 15-гадовая пасажырка гэтага лiхача атрымала траўмы.
Яшчэ адзiн момант, якi падлеткi iгнаруюць, — святлоадбiвальныя элементы. Менавiта iх адсутнасць прывяла да трагедыi ў Столiнскiм раёне. Чатыры начныя падарожнiкi iшлi па ўскрайку дарогi. Двое з iх трапiлi пад колы аўтамабiля. Вадзiцель, якому толькi споўнiлася 18, не меў правоў, але ўзяў у знаёмага легкавушку. А праз пэўны час насмерць збiў сваю равеснiцу, а непаўналетнi хлопец атрымаў сур`ёзныя траўмы. Гора-вадзiцель кiнуўся наўцёкi, але дарэмна…
Таксама не ўдалося ўцячы ад iнспектараў ДАІ i 16-гадовым мiнчанам, якiя пасля застолля вырашылi пакалясiць па начных вулiцах. Вадзiцель пад мухай i двое яго сяброў выскачылi з машыны i разбеглiся, нiбыта тараканы. А кiнутая iмi машына тым часам пашкодзiла дзве легкавушкi. Цяпер вадзiцелю давядзецца адказаць i за ваджэнне без правоў, i за ўчыненае ДТЗ, i за непадпарадкаванне iнспектарам ДАІ, i за тое, што п`яны сеў за руль. Дорага абыдзецца яму гэты начны ваяж…
Яшчэ адзiн «герой» нападпiтку проста ўляцеў у аўтобусны прыпынак. Вынiк — пад коламi апынулася дзяўчына, якой, так бы мовiць, не спатрэбiлася медыцынская дапамога. Цяпер у яго будзе шмат часу, каб паразважаць над тым, што здарылася. Толькi дзяўчыну ўжо не вернеш…
У апошнiя днi школьнага года супрацоўнiкi Дзяржаўтаiнспекцыi яшчэ раз наведалi навучальныя ўстановы i звярнулi ўвагу дзяцей i дарослых на летнюю небяспеку на дарогах. У прыватнасцi, на тое, што катацца на ролiках i скейтбордах можна толькi ў двары, скверы цi парку на спецыяльна абсталяваных пляцоўках, сцяжынках, алеях, але не паблiзу транспартных сродкаў i вялiкага скаплення пешаходаў. Дзiцяцi да 14 гадоў забаронена выязджаць на веласiпедзе на дарогу агульнага карыстання — гэта таксама трэба няўхiльна выконваць.
Звярнулi спецыялiсты ўвагу i на такую акалiчнасць. Калi мы, дарослыя, станем на дарозе прыкладам для сваiх дзяцей, калi не будзем забываць паўтараць простыя правiлы бяспекi, то многiх няшчасных выпадкаў удасца пазбегнуць.
Ганна МАСЛАВА, Вiцебск