У аснову карціны лягло апавяданне Вольфганга Кольхаазе «Персідскі для капо». Дзеянне фільма разгортваецца падчас Другой сусветнай вайны ў акупіраванай Еўропе. Бельгіец яўрэйскага паходжання Жыль Крэм'е трапляе ў канцлагер пры спробе збегчы ў Швейцарыю. Падчас перавозкі адзін з таварышаў па няшчасці прапануе Жылю рэдкае выданне кнігі на фарсі ў абмен на бутэрброд. Бельгіец з неахвотай згаджаецца, але менавіта гэта кніга ратуе яму жыццё. Жыль пераконвае нямецкіх салдат, што ён не яўрэй, а перс, і такім чынам пазбягае расстрэлу. Па шчаслівым збегу абставін галоўны кухар канцлагера немец Клаўс Кох якраз шукае перса, які змог бы навучыць яго фарсі. Пасля вайны Кох марыць адкрыць свой рэстаран у Іране. Так пачынаецца гісторыя яўрэя і немца, вязня і турэмшчыка, вучня і настаўніка.
Рэжысёр фільма падкрэслівае, што для яго, яўрэя па паходжанні, было важна папрацаваць над карцінай пра трагедыю яўрэяў у Другой сусветнай вайне. Аднак «Урокі фарсі», на яго думку, не пра халакост.
— Гэта кінастужка пра ўзаемадзеянні паміж людзьмі. Гэта фільм пра давер, — перадае яго словы bbc.com.
Рэжысёр адзначае, што яго задачай было паказаць нацыстаў не як машыны для забойства, але знайсці ў іх нешта чалавечае.
Сусветная прэм'ера адбылася на Берлінскім кінафестывалі. Публіка сустрэла карціну доўгімі авацыямі. Акрамя таго, стужка ўвайшла ў праграму спецыяльных паказаў 42-га Маскоўскага міжнароднага кінафестывалю. Нарэшце «Урокі фарсі» могуць паглядзець і беларусы — учора ў нашай краіне стартаваў яго пракат.
mila@sb.by
фото simkl.in
