Вынікі рэйда ДАІ: толькі адзін з трыццаці вадзіцеляў не змяніў летнюю гуму на зімнюю

Вечарам рух на вуліцы Арлоўскай асабліва інтэнсіўны. Пралятае адна легкавушка, другая, трэцяя... Усе на зімовай гуме. Дарэчы, зараз такое надвор`е, што на летняй гуме вырашыцца выехаць толькі самы адчайны аўтамабіліст — на дарозе галалёдзіца.

— Якраз 1 снежня выпала шмат снегу. Былі заносы і дробныя ДТЗ. Адно з іх здарылася на Чарвякова, — успамінае акалічнасці здарэння старшы інспектар ДПС Аляксей Хадасевіч. — Сутыкнуліся дзве легкавушкі. Вадзіцель апошняй спрабаваў тармазіць, але быў на летняй гуме. Не ўлічыў, што на слізкай дарозе яе каэфіцыент счаплення з дарожным пакрыццём памяншаецца ў разы, а тармазны і прыпыначны шлях павялічваецца. І заехаў у «Рэно», што рухалася перад ім.

20 хвілін мерзнем у чаканні парушальнікаў — і нікога. Зразумела, на бяспецы не варта эканоміць.

Аляксей Хадасевіч спыняе чырвоны Citroen.

— Усесезонка, — інспектар паказвае на шыны з надпісам All Seasons. — Вышыня пратэктара — 4 мм. Гэта неабходны мінімум.  Але ў нас ездзіць на іх узімку непажадана: нягледзячы на маркіроўку, усесезоннымі іх можна назваць вельмі ўмоўна. Яны больш падыходзяць для цёплых і маласнежных зім.

Вадзіцель Citroen Аркадзь і сам разумее, што усесезонная гума — не вырашэнне праблемы. Пры вялікіх маразах Аляксей Хадасевіч рэкамендуе выкарыстоўваць спецыяльна прызначаныя для такіх умоў пакрышкі з індэксамі: Winter (W — «Зіма»), M + S (Mud + Snow — «Бруд + Снег»). На такіх пакрышках аўтамабіль будзе ўстойлівы на зімовай дарозе:

— Пару тыдняў таму спыніў Peugeot, а ў яго на пярэдняй восі «зіма», а на задняй — «усесезонка». Некаторыя, спрабуючы сэканоміць ставяць «зіму» толькі на адной вядучай восі, а на задняй наогул «лета» пакідаюць. Гэта забаронена. Адрозныя па каэфіцыентах счаплення колы пярэдняй і задняй восі могуць прывесці да заносу.

А што з маршруткамі? Пад`язджаем да прыпынку грамадскага транспарту і разглядаем колы пад`язджаючых мікрааўтобусаў. Усе як адзін у «зіме».

— Перад выездам у рэйс маршруткі, як і ўвесь гарадскі пасажырскі транспарт, праходзяць перадрэйсавую праверку. Машыну на летняй гуме ніхто не паставіць на лінію, — Аляксей Хадасевіч супакоіў мяне і іншых пасажыраў грамадскага транспарту.

Адпрацаваўшы Арлоўскую, рухаемся да Харужай. Спыняемся ля адной са шматпавярховак і аглядаем прыпаркаваныя ў крайняй правай паласе аўтамабілі — парушальнікаў няма. А вось у двары гэтай самай шматпавярхоўкі знаходзім Audi, вырабленую ў мінулым стагоддзі, якая мерзне на летніх шынах.

— Хутчэй за ўсё, «пралеска», — робіць выснову Аляксей Хадасевіч, агледзеўшы машыну, на якой, па ўсіх прыкметах, даўно не ездзілі.

Гэтую Audi Аляксей Хадасевіч бярэ на аловак.

І ўсё ж, нягледзячы на ўхвальную законапаслухмянасць нашых аўтамабілістаў, аднаго парушальніка мы ўсё ж знайшлі. Гэта вадзіцель чорнай Toyota.

— Купіла шыны яшчэ два тыдні таму, ды ўсё ніяк часу не знайду з`ездзіць у СТА «пераабуцца», — апраўдваецца аўталэдзі, у якой на колах «лета», а ў багажніку «зіма».

Аплаціўшы штраф, дзяўчына паабяцала, што сёння ж пасля працы абавязкова наведаецца ў шынамантаж.

Мінімальная колькасць парушальнікаў не здзівіла інспектараў: штрафы кусаюцца. У першы раз прыйдзецца расстацца з сумай да 1 базавай велічыні, паўторнае парушэнне на працягу года —  ад 2 да 5 базавых. Лепш пусціць гэтыя грошы на новыя шыны.

— З сабой пажадана мець поўнапамерную запаску з зімовай гумай. Ці мала што можа здарыцца ў дарозе, — напрыканцы раіць аўтамабілістам Аляксей Хадасевіч.

gorbatenko_inna@mail.ru