Вось і прыйшоў радасны момант, калі мы адзначаем урачыстасць Хрыстовага нараджэння і рыхтуемся ўступіць у новы каляндарны год. Нараджэнне Хрыста — гэта таямніца, над якой стагоддзямі разважаюць многія людзі.
Наша краіна з’яўляецца ўнікальнай у свеце, паколькі двойчы адзначае нараджэнне Хрыста — 25 снежня і 7 студзеня. Наш Урад — адзін з нямногіх, які абедзве даты прызнаў святочнымі і свабоднымі ад працы. Гэта выглядае вельмі лагічным, паколькі ў беларускім грамадстве заходнія і ўсходнія галіны хрысціянства маюць значны ўплыў на насельніцтва і вельмі добра суіснуюць разам.
Навукоўцы сцвярджаюць, што канчаткова немагчыма вызначыць дзень, калі канкрэтна Хрыстос стаў чалавекам і нарадзіўся на нашай зямлі. Аднак паколькі 25 снежня — гэта асаблівая дата, калі дзень і ноч прыкладна роўныя, а дзень пачынае павялічвацца, замацаваўся звычай святкаваць Божае Нараджэнне (Раство) 25 снежня, якое па юліянскім календары прыпадае на 7 студзеня. Хрысціяне вераць, што са з’яўленнем Хрыста ў свеце становіцца больш святла, якое перамагае цемру зла і граху.
Згодна з беларускай традыцыяй, святкаванне Раства пачынаецца ўвечары 24 снежня (6 студзеня). Калі на небе з’яўляецца першая зорка, сям’я сядае за святочны стол, на якім няма мясных страў. Радуецца сэрца, калі гаспадыні рыхтуюць на гэты стол розныя посныя стравы, рэцэпт якіх перадаецца з пакалення ў пакаленне.
У каталіцкіх сем’ях нашага рэгіёну прынята перад пачаткам святочнай вячэры падзяліцца аплаткай — невялікім кавалкам прэснага цеста, выпяканым з белай мукі. Хлеб, выпечаны з такога цеста, ужываецца ў каталіцкай літургіі. Католікі, сасланыя ў царскія часы ў Сібір, не мелі магчымасці ўдзельнічаць у літургіі і вырашылі дзяліцца паміж сабою гэтым белым прэсным хлебам, просячы прабачэння за памылкі мінулага года і прызываючы Божую дапамогу на год наступны.
З’яўленне Хрыста на зямлі было неабходна, бо толькі любоў Хрыста перамяняе жыццё, вылечвае нашы самыя глыбокія раны, вызваляе з заганнага кола незадаволенасці, гневу і наракання. Нават у самых неспрыяльных абставінах мы можам заставацца чалавечнымі і атрымліваць дапамогу ад Божага Сына.
Няхай супакой і дабро, радасць і надзея паселяцца ў нашых сэрцах! І няхай гэта дабро мы занясём іншым.
Ксёндз Кірыл Бардонаў
Хрыстос нарадзіўся!
Полная перепечатка текста и фотографий запрещена. Частичное цитирование разрешено при наличии гиперссылки.