Мы посмотрели, как хаус-мастера справляются с проблемой завоздушивания систем отопления в жилых домах

Калi батарэi просяць цяпла

На гэтым тыднi разам з пахаладаннем прыйшла i добрая навiна: у кватэры, школы, бальнiцы i iншыя сацыяльныя ўстановы пачалi падаваць цяпло. Аднак не ўсе жыхары дамоў пасля запуску сiстэмы ацяплення гэта заўважылi — у некаторых кватэрах батарэi так i засталiся халодныя. Карэспандэнт «Р» паглядзеў, як спецыялiсты змагаюцца з адной з прычын дадзенай праблемы — заваздушваннем сiстэм ацяплення.

У жылых дамах аўтаматычныя сiстэмы рэгулявання працуюць у залежнасцi ад тэмпературы вонкавага паветра

Горача? Холадна!

У Мiнску жыллёвы фонд падключылi да ацяплення за тры днi — з 13 па 15 кастрычнiка. Прыкладна ў гэты ж час, адразу пасля запуску сiстэмы, хаўс-майстры абследуюць падвалы i тэхнiчныя паверхi. Там спецыялiсты працуюць са «спускнiкамi»: адкрываюць краны, праз якiя выходзiць лiшняе паветра.

Правяраць заваздушванне сiстэм ацяплення на праспекце Ракасоўскага iду з галоўным iнжынерам ЖЭУ № 1 Ленiнскага раёна Мiнска Аляксандрам Хадорыкам i рабочым па комплексным абслугоўваннi i рамонце будынкаў i збудаванняў Уладзiмiрам Дзёмкiным.

Правяраем заваздушванне сiстэм з галоўным iнжынерам Аляксандрам ХАДОРЫКАМ i хаўс-майстрам Уладзiмiрам ДЗЁМКIНЫМ

— На рэгулiроўку i наладжванне сiстэм ацяплення жылых дамоў даецца дзесяць каляндарных дзён, — удакладняе галоўны iнжынер. — Але мы стараемся ўкласцiся ў больш кароткiя тэрмiны. Наш участак абслугоўвае 91 дом, або больш за 2000 стаякоў. Кожны трэба праверыць, цi спраўна функцыянуе.

Праца гэтая няхiтрая, але патрабуе намаганняў. Каб цяпло хутчэй паступiла ў кватэры, майстры iмкнуцца праверыць усе сiстэмы за мiнiмальны час. На першым этапе iм трэба дабрацца да трубы, якая падае ваду ў стаяк. Спецыялiст можа навобмацак вызначыць заваздушванне: пры нармальным функцыянаваннi труба павiнна быць цёплай цi гарачай.

Адразу пасля запуску сiстэмы ацяплення хаўс-майстры абследуюць падвалы i тэхнiчныя паверхi

— Калi яна халодная, стаяк трэба разваздушваць, — тлумачыць хаўс-майстар. — Для гэтага праз шланг з сiстэмы спускаюцца вада i паветра, якое не дае батарэям награвацца. Важнае ўдакладненне: разваздушванне сiстэмы ацяплення ўваходзiць у артыкул выдаткаў на тэхнiчнае абслугоўванне, гэта значыць, што за злiтую ваду не прыйдзецца плацiць грошы.

Тэлефанаваць па 115

Разваздушванне сiстэмы ацяплення — адзiн з апошнiх этапаў працы хаўс-майстра. Калi ўсё добра, падчас ацяпляльнага сезона больш нiякiя манiпуляцыi не патрэбны. Праблемы на сетках цеплазабеспячэння могуць узнiкнуць з-за аварый, якiя ў апошнi час здараюцца рэдка.

Бываюць выпадкi, калi аднаго круга разваздушвання недастаткова. Тады жыхары могуць звярнуцца з праблемай халодных батарэй па адзiным нумары тэлефона 115 або ў дыспетчарскую мясцовага ЖЭСа. Аднак часта такiя звароты  неабгрунтаваныя:

— Многiя людзi лiчаць, што пасля ўключэння ацяплення батарэi адразу ж павiнны стаць гарачымi, як чайнiк з кiпенем. Гэта не так. У жылых дамах аўтаматычныя сiстэмы рэгулявання працуюць у залежнасцi ад тэмпературы вонкавага паветра. Ад гэтага паказчыка ўстанаўліваецца тэмпература вады, якая будзе падавацца ў радыятары, — распавядае Аляксандр Хадорык.

Калi на вулiцы 11 градусаў цяпла, аптымальная тэмпература цеплазабеспячэння — 40 градусаў

Галоўны iнжынер адкрывае размеркавальны шчыт i паказвае значэннi:

— Цяпер на вулiцы прыкладна 11 градусаў цяпла. Па лiчыльнiку мы бачым, што праграма выбрала для такога надвор’я аптымальную тэмпературу цеплазабеспячэння ў межах 40 градусаў. Пры гэтым значэннi батарэя будзе цёплай, але не гарачай.

Калi пытаннi ў людзей усё ж застаюцца, спецыялiсты прапануюць дадаткова праверыць параметры цеплавога вузла. Калi яны адпавядаюць графiку якаснага рэгулявання, раяць замераць тэмпературу паветра ў памяшканнях кватэры — прыбор павiнен паказваць не менш за 18 градусаў. На гэтую лiчбу трэба арыентавацца, каб вызначыць, цi мае месца парушэнне ў рабоце ацяпляльнай сiстэмы. Калi тэмпература нiжэй за норму, майстры будуць шукаць i ўстараняць прычыны.


— Аднак, як правiла, да гэтага справа не даходзiць: людзi разумеюць, што ў iх кватэрах, можа, i халаднавата, але больш за 18 градусаў, i адмаўляюцца ад замераў, — заключае Аляксандр Хадорык.


grudnitskiy@sb.by
Полная перепечатка текста и фотографий запрещена. Частичное цитирование разрешено при наличии гиперссылки.
Заметили ошибку? Пожалуйста, выделите её и нажмите Ctrl+Enter
Фото: Алексей МАТЮШ