Чым Асіповіцкі раён прыцягвае інвестараў?

Заўтра пачынаецца ўчора. Стан прамысловасці Асіповіцкага раёна толькі пацвярджае сэнс гэтай прымаўкі. Стаўка, якую робяць мясцовыя ўлады на аднаўленне прадпрыемстваў, іх шматпрофільны кірунак і стварэнне станоўчага інвестыцыйнага клімату забяспечваюць дынамічнае развіццё вытворчасці. З пачатку года аб’ём прамысловай вытворчасцi ў параўнанні з адпаведным перыядам 2015-га склаў больш за 125 працэнтаў. А паказчык запасаў гатовай прадукцыі, наадварот, заўважна знізіўся. Старшыня Асіповіцкага райвыканкама Пётр Шукаловіч (на здымку) расказаў:

— Пачуццё ўпэўненасці нам надае ўзяты некалькі год таму курс на новыя тэхналогіі, бесперапынную мадэрнізацыю існуючых прадпрыемстваў і стварэнне новых. Прыкладам такой паспяховай працы можа служыць дзейнасць аднаго з буйнейшых прадпрыемстваў нашай будаўнічай індустрыі дахавага завода «Тэхнаніколь». Ён  існаваў і раней, аднак пасля таго як напрыканцы дзевяностых прыйшоў расійскі інвестар, у завода пачалося другое жыццё. Зараз прадпрыемства займае лідзіруючыя пазіцыі на нашым рынку па выпуску дахавых і гідраізаляцыйных матэрыялаў. А яшчэ з’яўляецца адным з галоўных экспарцёраў: каля паловы прадукцыі, што выпускаецца тут, ідзе ў краіны Балтыі, Украіну, Малдову, карыстаецца попытам у Чэхіі, Германіі, Галандыі, Італіі, Румыніі і іншых еўрапейскіх краінах. І пры гэтым трэба ўлічваць, што «Тэхнаніколь» — прадпрыемства сезоннае, зімой яго актыўнасць па зразумелай прычыне не такая, як вясной ці летам. Дзякуючы інвестарам мы мадэрнізавалі і іншыя прадпрыемствы, пабудавалі новыя — за мінулую пяцігодку, да прыкладу, раён «прырос» больш чым шасцюдзесяццю прадпрыемствамі.

— Пётр Яфімавіч, шукаючы інвестараў, сёння кожны горад і раён гатовы даказваць свае перавагі перад іншымі. Чым іх прыцягваюць Асіповічы? Якія аргументы знаходзіце, калі пераконваеце інвестараў укласці грошы ў развіццё мясцовых кампаній ці рэалізацыю праектаў?

— Выгаднае геаграфічнае становішча — гэта тое, што на паверхні. Асіповічы, можна сказаць, спадарожнік Мінска: да яго рукой падаць. Ёсць у нас і чыгунка, па якой груз можна даставіць як у Расію, так і ў іншыя краіны Еўропы. Дарэчы, раён ва ўсе часы выкарыстоўваў свае лагістычныя перавагі і развіваў прамысловасць. Мы стараемся не проста ўлічваць асаблівасці сучаснага рынку, пакупніцкага попыту, але і прадугледжваць тэндэнцыі часу. Акрамя сучасных тэхналогій, зніжэння сабекошту прадукцыі і павышэння якасці прадукту гэта яшчэ і граматны маркетынг. Той жа «Тэхнаніколь», да прыкладу, выкарыстоўвае перавагі дылерскай сеткі, а фабрыка «Сонца», дзе робяць сінтэтычныя мыйныя сродкі, у хуткім часе плануе зарэгістраваць у Польшчы свой гандлёвы дом, што дазволіць і так добра вядомаму на Захадзе брэнду яшчэ больш надзейна замацаваць свае пазіцыі.

Інвестары таксама ўлічваюць магчымасці падатковых ільгот. Тое ж «Сонца», да слова, зарэгістравана як рэзідэнт свабоднай эканамічнай зоны «Магілёў». А адзін з этапаў перааснашчэння «Тэхнаніколь» супаў з дзейнасцю прэзідэнцкага Дэкрэта аб стымуляванні прадпрымальніцкай дзейнасці на тэрыторыі сярэдніх і малых гарадоў і сельскай мясцовасці, што таксама дало заводу падатковыя прэферэнцыі. Усяго пры прагнозе 2,6 мільёна долараў ЗША ў студзені — верасні гэтага года ў Асіповіцкі раён паступіла 2,8 мільёна долараў прамых замежных інвестыцый на чыстай аснове. Калі браць за пяцігодку — з 2011 па 2015 год, — то за гэты час інвестыцыйная «скарбонка» раёна папоўнілася на 197,4 мільёна долараў замежных інвестыцый. Рэалізацыя інвестпраектаў дапамагае не толькі развіваць вытворчасць, папаўняць бюджэт, але і ствараць працоўныя месцы. Толькі за тры першыя кварталы года ў раёне працаўладкавана 127 чалавек (пры заданні 105), у тым ліку на новых прадпрыемствах — 83. Акрамя таго, актыўная палітыка прыцягнення інвестыцый дапамагае ў вырашэнні лёсу былых ваенных аб’ектаў, а іх на тэрыторыі раёна нямала.

— Ажыццяўленне якіх інвестпраектаў зараз на парадку дня?

— Спіс прадпрыемстваў раённага цэнтра не так даўно папоўніўся яшчэ адным — па вытворчасці тэрмаплёнак «Тэхсаюз Полюс», зараз яно на стадыі станаўлення. Увядзенне ў строй гэтага завода стане чарговым важкім укладам у эканоміку раёна. Спадзяёмся, што папулярнасці яму дадасць і адкрыццё турыстычнага комплексу, які будуе кампанія «Газпром трансгаз Беларусь». На тэрыторыі турыстычнага комплексу размесцяцца гасцініца, тэнісныя корты, дамы паляўнічага і рыбака і нават верталётная пляцоўка. А ў сам гасцявы комплекс уваходзяць пакоі адпачынку з кінатэатрам, канферэнц-, спартыўнай заламі. Мясціны ў нас, дарэчы, прыгожыя, таму ў справе развіцця агратурызму асіпаўчане адны з лепшых на Магілёўшчыне: сёння шматлікіх гасцей чакае больш за трыццаць аграсядзіб раёна.

Канешне, даючы старт таму ці іншаму праекту, мы ацэньваем як яго эканамічную значнасць, так і сацыяльную неабходнасць. Напрыклад, імклівае развіццё Паўночнага мікрараёна ў Асіповічах стала сігналам да будаўніцтва тут гандлёва-забаўляльнага цэнтра. Плануецца, што пакупнікі змогуць там не толькі набыць нейкі тавар, але і добра правесці час, прычым усёй сям’ёй.

— Наколькі я ведаю, быў намер адкрыць у раённым цэнтры і свой аквапарк. Нейкія крокі ў гэтым накірунку зроблены?

— І даволі заўважныя. Большая частка корпуса будучага аквапарка пабудавана. Наогул плануецца дзве чаргі яго здачы: першая — непасрэдна сам басейн, водныя горкі, атракцыёны і гэтак далей. А падчас другой у строй будзе ўведзена спартыўная зала, якая зможа прымаць спаборніцтвы сусветнага ўзроўню. Сама магчымасць будаўніцтва такіх знакавых аб’ектаў — вынік дзяржаўнага-прыватнага партнёрства, утрымання планкі эканамічнага развіцця і аб’ёму экспартных паставак. Дарэчы, на гэтым спіс буйных сацыяльных праектаў не заканчваецца.  У Асіповічах будуецца тэрапеўтычны корпус раённай бальніцы на сто ложкаў. Праект дарагі, але вельмі патрэбны: стары будынак, якому больш за паўстагоддзя, ужо не адпавядае патрабаванням часу. Першая чарга, куды ўвайшлі падсобныя памяшканні, ужо здадзена. Праз год плануем завяршыць будаўніцтва і асноўнага корпуса.