Гэты сезон у сусветным біятлоне асаблівы. Праз год пасля заканчэння Алімпійскіх гульняў не ўсе страляючыя лыжнікі выйшлі на старт першага этапу Кубка свету ў Швецыі: так, кар’еру вырашылі скончыць нарвежка Тура Бергер і немка Андрэа Хенкель, з-за траўмы яго прапускае ўкраінка Віта Семярэнка. Таксама па-за мяжой спорту засталіся французскія біятланісткі Мары-Лор Брунэ і Мары Дарэн-Абер. Самы час для нашай тройчы алімпійскай чэмпіёнкі Дар’і Домрачавай заваяваць адзіную ўзнагароду, якой яшчэ няма ў яе калекцыі, — Вялікі крыштальны глобус.
Падаецца, менавіта да гэтай мэты і ідзе спартсменка: яна добра рыхтавалася ў міжсезонне і зараз адчувае сябе на лыжні вельмі ўпэўнена. Узяць, напрыклад, змешаную эстафету, якую нашы біятланісты скончылі на адзінаццатым радку пратакола: Домрачава стартавала з дзевятнаццатай пазіцыі, а фінішавала першая. Матывацыі ў яе хапае: і ўзнагароду трэба заваёўваць, і заданне кіраўнікоў зберагчы квоту — чатыры спартсменкі ў спрынце і індывідуальных гонках — выконваць. На руку ёй і новая экіпіроўка — спецыяльна сканструяваныя лыжы і выгнутыя палкі, якія, спадзяецца сама Дар’я, добра паўплываюць на яе хуткасць. А таксама сэрвісмэн, які займаўся падрыхтоўкай лыж у алімпійскім Сочы. Івар Улеклёйв павінен быў пакінуць зборную ў гэтым годзе, але Домрачава дабілася таго, каб нарвежац застаўся яшчэ на сезон. Калі адкрываюцца такія перспектывы, рызыкаваць нельга. Яшчэ адзін важны чалавек, які прымкнуў да нашых біятланістаў, — аўстрыйскі спецыяліст Альфрэд Эдэр. Ён змяніў Клаўса Зіберта на пасадзе старэйшага трэнера жаночай зборнай. Славіцца аўстрыец хуткай стральбой па мішэнях. У свой час навучыў гэтаму сына — прызёра Алімпійскіх гульняў і чэмпіянатаў свету Сімона Эдэра. Спадзяёмся, “падцягне” стральбу новы трэнер і нашым біятланісткам.
Хаця аналагічная задача на Кубку свету стаіць і перад мужчынскай зборнай, у жанчын козыраў, здаецца, больш. У іх камандзе і бронзавы прызёр Алімпіяды ў Сочы Надзея Скардзіна. Дзяўчына хаця і перанесла аперацыю на правым воку, ужо прывучылася цэліцца па мішэнях левым. І гэта ў яе атрымліваецца нядрэнна. У страі таксама нашы вопытныя байцы Надзея Пісарава і Анастасія Дубарэзава, да якіх прымкнула Анастасія Каліна.
Больш значныя змены перажыла мужчынская зборная: ад спорту адышлі адразу сярэбраны прызёр Алімпіяды-2010 Сяргей Новікаў, Яўген Абраменка і Уладзімір Алянішка. На іх месцы прыйшлі маладыя хлопцы — Дзмітрый Будзіловіч, які адправіўся на першы этап Кубка свету ў Швецыю, а Раман Ялётнаў і Віктар Крыўко выйшлі на старт Кубка IBU у нарвежскім Бейтастолене. У іх ёсць яшчэ тры гады, каб падрыхтавацца да наступных зімовых Алімпійскіх гульняў. Аднак вынік у мужчын пакуль не самы добры: у мужчынскай індывідуальнай гонцы лепшы з нашых біятланістаў Уладзімір Чапелін заняў 47-е месца, Юрый Лядаў — 72-е, Аляксандр Дарожка — 92-е, а Дзмітрый Будзіловіч — толькі 95-е. Раман Ялётнаў у Бейтастолене ў спрынце стаў
30-ы, Віктар Крыўко — 54-ы. А вось дзяўчаты і ў гэтым турніры парадавалі: Ірына Крыўко прынесла краіне першы мядаль — бронзу ў спрынце Кубка IBU, а васямнаццацігадовая Ганна Сола ў ім стала чацвёртай.
Такі пачатак сезона — зусім не прычына сумаваць. Па сутнасці, гэта першы старт на снезе. Біятланістам таксама патрэбны час на тое, каб раскрыць увесь свой патэнцыял. Толькі ў снежні ў іх запланаваныя тры этапы Кубка свету, у тым ліку ў аўстрыйскім Хохфільцэне і славенскай Паклюцы. Так што трэба са старту набіраць хуткасць. Калі нумар падпісваўся да друку, жанчыны выходзілі на старт індывідуальнай гонкі. Спадзяёмся, што нашы біятланісты змогуць паказаць, на што здольныя.
