Усё жыццё пражыць у Беларусі — і яшчэ больш палюбіць краіну пасля прагляду невялікага відэароліка

Усё жыццё пражыць у Беларусі — і яшчэ больш палюбіць краіну пасля прагляду невялікага відэароліка. Прыкладна такое эмацыйнае і нечаканае нават для самога сябе адкрыццё зрабілі нядаўна многія ў Круглай зале мінскага “Прэзідэнт-гатэля”. Убачыўшы краіну збоку вачамі прафесіяналаў — жывапіснай, душэўнай, адкрытай і вельмі прыветлівай.

Гавораць, трыццаць гадоў назад, напярэдадні эпохі разрадкі, амерыканскі прэзідэнт Рэйган перад першай сустрэчай з лідарам СССР не менш як восем разоў перагледзеў аскараносны савецкі фільм “Масква слязам не верыць”. І ўсё толькі для таго, каб спасцігнуць нашу “загадкавую душу”. Але сёння такія ахвяры — амаль 20 гадзін асабістага часу — былі б цалкам без патрэбы. Прынамсі, для тых, хто спрабуе зразумець сучасную і незалежную нашу краіну. Пяціхвілінны высокамастацкі краінавы відэаролік “Беларусь. Краіна для жыцця” — высакаякасны і надзвычай насычаны яркімі ды вядомымі вобразамі праект. У аснову аўтарскай рэжысёрскай версіі роліка леглі віды Мінска і помнікаў беларускай архітэктуры, знятыя з вышыні птушынага палёту. А таксама хараство прыроды і вобразы пазітыўна настроеных герояў розных пакаленняў у розных жыццёвых сітуацыях.

Гэтак жа вобразна прадзюсар Валерый Краўчук адзначыў, што нават у выключна друкаваным выглядзе сцэнарый гэтага міні-фільма быў на­дзвычай “смачным”:

— І наша задача была зрабіць такі ролік, каб эмоцыі са сцэнарыя перанесліся ў відэарад. Нам падаецца, што гэтую задачу мы выканалі. Але ацэньваць, вядома, гледачам.

Яго калега Уладзімір Папоў не прамінуў адзначыць яшчэ адну ўнікальнасць і знакавасць гэтага фільма:

— Гэта першы праект такога ўзроўню, зроблены цалкам — літаральна ад пачатку да канца — беларусамі. Цяпер мы маем першы нацыянальны іміджавы прадукт.

Што гэта дасць у канчатковым выніку? Як мінімум — пазнавальнасць краіны на планеце. І першыя вынікі ёсць ужо сёння. Стварэнне падобных высокамастацкіх краінавых відэаролікаў — рэч заўсёды вельмі рызыкоўная, бо на густ і колер, як вядома, адзінага меркавання можа не аказацца. Аднак у выніку апраўдаліся ўсе спадзяванні. І Міністэрства інфармацыі, якое выступіла арганізатарам праекта, не пралі­чылася. Прынамсі, міністр Лілія Ананіч бачыць, што замежныя тэлеканалы ўжо ідуць насустрач:

Папулярызуючы пры гэтым наш ролік і нашу краіну. Значыць, нас любяць і разумеюць. Не так даўно быў прэзентаваны фільм “Дыскаверы” пра Белавежскую пушчу, цяпер у фільма каля 40 тысяч праглядаў на YouTube. Цяпер новы ролік дазволіць дапоўніць, пашырыць інфармацыю пра нашу краіну за мяжой. Цікавасць да работы ўжо праявілі такія тэлеканалы, як СТС, Euronews і RTVi.

 Дарэчы, перагаворы з тэлеканалам Euronews па трансляцыі відэароліка “Беларусь. Краіна для жыцця” плануюцца на бліжэйшы час. Акрамя таго, гэты міні-фільм будзе транслявацца на нацыянальных каналах. Сам факт з’яўлення падобнага прадукту, асабліва на англійскай мове, начальнік упраўлення інфармацыі — прэс-сакратар Міністэрства замежных спраў Дзмітрый Мірончык лічыць вельмі своечасовым. Цікавасць да краіны ва ўсім свеце значна ўзрастае, так што іміджавы ролік будзе вельмі запатрабаваны.