У мінулую суботу ў Верхнядзвінскім раёне на базе ААТ «Прудзінкі» прайшлі абласныя «Зажынкі»
ПЕРШЫ сноп новага ўраджаю ўручыла намесніку старшыні Віцебскага аблвыканкама Эдуарду ДЗЯМ’ЯНАВУ галоўны тэхнолаг раёна, намеснік начальніка райсельгасхарчу па раслінаводству Люцыя ГРЭСЬКО: — Гэта мая саракавая ўборачная, — сказала яна, — і самая складаная за ўсе гады. Колас «прайшоў» вялікі снег, вялікую ваду, вялікую жару і — выстаяў: цяжкі, прыгожы, вясёлы. Сёння, гледзячы на багатыя палеткі пшаніцы, ячменю, жыта ў раёне, цяжка паверыць, што яшчэ вясной ураджай быў пад пагрозай гібелі: Дзвіна, выйшаўшы з берагоў, затапіла тады не толькі тысячы гектараў пасеваў, але і палову самога Верхнядзвінска. Днём і ноччу працаваў штаб на чале са старшынёй райвыканкама Ігарам МАРКОВІЧАМ. Былі прыняты ўсе магчымыя і нават немагчымыя меры па выратаванні азімых, па правядзенні ў вельмі складаных умовах сяўбы яравых. Летась верхнядзвінцы сабралі рэкордны ўраджай — 88,4 тысячы тон, 34,8 цэнтнера на круг. Сёлета яны разлічваюць паўтарыць поспех.
Эдуард Дзям’янаў адзначыў, што Верхнядзвінскі раён працягвае слаўныя хлебаробскія традыцыі і, нягледзячы на ўсе цяжкасці, учыненыя прыродай, вырасціў добры ўраджай. Ён падзякаваў сяльчанам за самаадданую працу.
Айцец Валянцін правёў малебен на паспяховае правядзенне ўборачнай і пакрапіў прысутных і тэхніку святой вадой.
Аб тым жа, як лепш і без страт сабраць у вобласці ўраджай, вялася гаворка з самай раніцы на семінары-нарадзе ў зале Верхнядзвінскага райвыканкама з удзелам старшынь райвыканкамаў, начальнікаў раённых упраўленняў сельскай гаспадаркі і харчавання, спецыялістаў аблсельгасхарчу. Разгледжаны пытанні па гатоўнасці тэхнікі, сушыльнай гаспадаркі, пунктаў прыёму зерня. Для больш эфектыўнай работы аўтамабільнага транспарту прапанавана раздзяліць яго функцыі: машынам сельгасарганізацый дастаўляць зерне толькі ад камбайнаў на зернеток. З зернетакоў гатовую прадукцыю забіраць транспартам камбінатаў хлебапрадуктаў і іншых арганізацый. Будуць задзейнічаны нават 64 машыны прадпрымальнікаў.
Яшчэ адзін важны момант: усё зерне абавязкова пройдзе тэрмічную апрацоўку. Для гэтага пастаўлена задача, каб усе сушылкі былі задзейнічаны кругласутачна. Абавязкова дапамагчы тым, у каго слабая сушыльная гаспадарка. Што і робіць не першы год ААТ «Шайцерава», у чым маглі пераканацца ўдзельнікі нарады на яе практычнай частцы.
У гаспадарцы 5 год назад узведзена новая сушылка. Сёлета з’явілася яшчэ адна — КЗСВ-30. Як паведаў дырэктар ААТ «Шайцерава» Міхаіл Гумнянкоў, дзве сушылкі за сезон могуць перапрацаваць 14 тысяч тон зерня. Летась сабралі 11,5 тысячы тон пры ўраджайнасці 47,5 цэнтнера з гектара. Занялі другое месца ў вобласці па гэтаму паказчыку і былі ўдзельнікамі рэспубліканскіх «Дажынак». Новая КЗС пабудавана на перспектыву, з разлікам на яшчэ большыя ўраджаі. А пакуль што ёсць магчымасць аказаць дапамогу і суседзям. Тым больш што сушылка дазваляе рыхтаваць на ёй зерня адразу на здачу дзяржаве.
Сакрэт поспеху верхнядзвінцаў яшчэ ў тым, што тут пры любых абставінах думаюць пра дзень наступны. Толькі-толькі прыступаюць да жніва, а тутэйшыя хлебаробы ўжо дбаюць пра ўраджай будучы. Прыклад таму — новабудоўля ў ААТ «Прудзінкі», дзе сёлета ўзведзены сучасны комплекс па падрыхтоўцы элітнага насення коштам 7,2 мільярда рублёў.
— Наша гаспадарка — насенневодчая. Абсталяванне італьянскай фірмы «Югус», якое зманціравана і гатова да работы, дазволіць рыхтаваць насенне па самых высокіх патрабаваннях. Усе зярняткі падбіраюцца адно да другога па вазе і памеру, не раўнуючы, як салдаты ў элітных войсках. А гэта гарантуе аднолькавую энергію прарастання, устойлівасць, — тлумачыць «БН» дырэктар ААТ «Прудзінкі» Васіль Краснік, таксама між іншым удзельнік леташніх рэспубліканскіх «Дажынак».
Элітным насеннем ААТ «Прудзінкі» забяспечыць не толькі гаспадаркі свайго раёна, але і многіх іншых у вобласці.
НА ЗДЫМКУ: намеснік Верхнядзвінскага начальніка райсельгасхарчу па раслінаводству
Люцыя ГРЭСЬКО ўручае першы сноп намесніку старшыні Віцебскага аблвыканкама Эдуарду ДЗЯМ’ЯНАВУ.
Уладзімір САУЛІЧ, «БН»
