РЫБНЫЯ ГАЛКI
Складнiкi: 500 г рыбы, 3 cт. лыжкi мукi, 2 яйкi, малако, 1 цыбулiна, соль, перац, зелянiна пятрушкi i кропу.
Выдалiць з рыбы косткi, прапусцiць праз мясасечку, злучыць з дробна нарэзанымi цыбуляй, зелянiнай пятрушкi i кропу, перцам, соллю, перамяшаць.
Муку распусцiць асцярожна ў малацэ да атрымання эластычнай масы, улiць узбiтае яйка, перамяшаць, злучыць з рыбай, перацерцi i ўзбiць у аднародную масу, з якой зрабiць невялiкiя шарыкi. Падрыхтаваць рыбны адвар з галоў, плаўнiкоў i костак, паперчыць, пасалiць i адварыць у iм галкi на слабым aгнi.
Рыбныя галкi — таксама i знакамiтае габрэйскае блюда...
ЛIНЬ МУДРАГЕЛIСТА ПРЫГАТАВАНЫ
Амаль па В.Завадзкай, аўтарцы «Кухаркi лiтоўскай»
Складнiкi: 1 лiнь, 1/2 цытрыны*, 100 г рысу, 20 г сушаных грыбоў, 2 памiдоры, 1 морква, 2 невялiкiя цыбулiны, 1 ст. лыжка мукi, 4 ягады ядлоўцу*, соль, зелянiна кропу i пятрушкi, шчыпяры цыбулi.
Вычышчанага лiня палiць цытрынавым сокам, нацерцi соллю i пакiнуць. Тым часам рыс прамыць i пражыць на патэльнi (без алею*) да залацiстага колеру. Грыбы зварыць у падсоленай вадзе, нарэзаць саломкай i падсмажыць на алеi разам з буйна нарэзанымi памiдорамi, морквай i цыбуляй. Дадаць солi i перцу. Рыс прыгатаваць у грыбным адвары. Лiня абкачаць у муцэ i падсмажыць з абодвух бакоў. На бляху з алеем спачатку пакласцi рыс, потым грыбы з агароднiнай, апошнiм пакласцi лiня, пасыпаць молатымi зярняткамi ядлоўцу, палiць грыбным адварам i запячы ў духоўцы. Гатовую страву пасыпаць сечанай зелянiнай кропу, пятрушкi i цыбулi.
* Цытрына — лимон
Ядловец — можжевельник
Алей — подсолнечное масло
ПЕРАЦ КРЫПАНЫ
Складнiкi: 500 г чырвонага салодкага перцу, 400 г мяса, 100 г рысу, 150 г таматавай пасты, 1 морква, 1 цыбулiна, 250 г памiдopaў, 1 ч. лыжка цукру, 50 г алею, 150 г смятаны, соль.
Струкi чырвонага салодкага перцу абмыць, абрэзаць верхавiны разам са сцяблом i вычысцiць насенне. Падрыхтаваны такiм чынам перац пакласцi ў кiпячую падсоленую ваду на 1 — 2 хвiлiны, затым выкласцi на ciтa i даць вадзе сцячы. Пасля гэтага напоўнiць накрыпкай (з мяса i рысу цi з агароднiны), паскладаць у рондаль, залiць вадой, дадаць масла i таматавай пасты; тушыць пад накрыўкай у духоўцы цi на агнi 30 — 40 хвiлiн.
Падрыхтоўка накрыпкi з мяса
Мяса прапусцiць праз мясасечку. Цыбулю дробна нашаткаваць, моркву нацерцi на дробнай тарцы, абсмажыць, дадаць да сечанага мяса i адваранага рысу, перамяшаць.
Падрыхтоўка накрыпкi з агароднiны
Моркву, пятрушку i цыбулю нарэзаць дробнай саломкай; падсмажыць на алеi, дадаць дробна нарэзаныя свежыя памiдоры без насення i скуркi, цукар, соль, перац i давесцi да гатовасцi.
Пры падачы на стол палiць смятанай.
ГУСIНАЯ ШЫЙКА
Складнiкi: 2 гусiныя шыйкi, грэцкiя крупы, гусiныя вантробы, 1 цыбулiна, 20 г карэння салеры, 50 г шмальцу, соль, перац.
Зняць скуру з кожнай шыйкi, не папсаваўшы яе, так, каб яна выглядала, як кiшка, нацерцi перцам i соллю, зашыць кожную з аднога канца. Прыгатаваць кашу з грэцкiх круп. Накрыпаць адну шыйку смажанымi гусiным шмальцам i цыбуляй з кашай, а другую — нарэзанымi гусiнымi вантробамi з цыбуляй, чорным перцам, салерай i таксама кашай, пасля чаго зашыць. Зашытыя шыйкi пакласцi ў гусятнiцу або глыбокую патэльню i тушыць у духоўцы, дадаўшы трохi солi i вады.
Гусiная шыйка таксама i габрэйскае блюда.
ЯЗЫК ВЕПРУКА*
Складнiкi: 1 язык вепрука, 1 лаўровы лiст, 5 гарошын духмянага перцу, 1 цыбулiна, 1 морква, соль.
У паляўнiчы кацёл пакласцi язык. Дадаць да смаку лаўровы лiст, гарошыны чорнага перцу, дробна нарэзаныя цыбулю i моркву, соль. Залiць вадой i варыць 4 гадзiны да мяккасцi. 3 варанага языка зняць скурку i нарэзаць тонкiмi ўкрухамi.
* Вяпрук — дикий кабан
По просьбе уважаемого Ю.Качука причитающийся ему авторский гонорар будет перечислен на счета Зельвенского районного социально-педагогического центра и Центра коррекционно-развивающего обучения и реабилитации г.п. Зельва.
