Афiцыйна такога арыгiнальнага праекта не распрацавана. Але калi ўдасца да 20 снежня здаць першую чаргу грандыёзнай рэканструкцыi Смаленскага калгаснага рынку Вiцебскага аблспажыўсаюза, то i сапраўды не сорамна будзе запрасiць на навагодняе наваселле ўсенародна любiмых казачных персанажаў.
Генпадрадчыкам па рэканструкцыi адказнага аб’екта з’яўляецца адкрытае акцыянернае таварыства «Вiцебскгандальбуд». Структура салiдная, якраз да Новага года абяцаюць «цэх пад адкрытым небам» зрабiць пад надзейным дахам. Замест ранейшых няўтульных i халодных «будак» для прадпрымальнiкаў i прадаўцоў з’явяцца 320 камфортных гандлёвых павiльёнаў.
Вядома, што работы наперадзе яшчэ непачаты край. Аб’ект рэканструкцыi нават па суме iнвестыцый салiдны i складае 9,5 мiльярда рублёў крэдытных рэсурсаў. I гэта не толькi прыгожы i надзейны дах, але i ўся складаная сучасная iнфраструктура. Працягваецца мантаж i аддзелка вытворчых месцаў, завяршаецца пракладка iнжынерных сетак, пакрыццё тратуарнай плiткай усёй рынкавай плошчы. Немалаважна, што асабiста старшыня Вiцебскага аблвыканкама Аляксандр Косiнец трымае на кантролi рэканструкцыю гандлёвага аб’екта спажыўкааперацыi. Па яго даручэннi распрацоўваецца комплексны бiзнес-план развiцця Смаленскага калгаснага рынку з праекцыяй добраўпарадкавання размешчаных побач тэрыторый. Не выключана, што ў недалёкай перспектыве рынак можа стаць часткай агульнага гiганцкага комплексу «Славянскi базар у Вiцебску». А гэта, пагадзiцеся, ужо зусiм iншы статус. Па сутнасцi, мiжнародны.