Экспазіцыя «Героі вайны на Краснай плошчы» знаёміць з рэліквіямі знакамітага парада — фотаздымкамі, дакументамі, асабістымі рэчамі яго ўдзельнікаў. На выставе экспануюцца падзякі і граматы за ўдзел у парадзе, запрашальныя білеты на прыём у Крэмль, пропуск на Красную плошчу. Мастацка аформленыя ўрыўкі з успамінаў дапамагаюць зразумець перажыванні і эмоцыі ўдзельнікаў парада перад важнай падзеяй. Экспазіцыйныя комплексы раскрываюць ваенныя біяграфіі салдат, афіцэраў і генералаў. Тут можна ўбачыць лыжку разведчыка Анатоля Галаўко, якую ён знайшоў у руінах будынка ў Берліне, кашулю, брытву, люстэрка маршала Георгія Жукава, гімнасцёрку Героя Савецкага Саюза лётчыка Канстанціна Марусічэнкі і іншыя прадметы.
Важная частка экспазіцыі — творы выяўленчага мастацтва. Наведвальнікі выставы бачаць партрэты камандуючых 1-м Украінскім, 1-м Беларускім, 2-м Беларускім франтамі маршалаў Івана Конева, Георгія Жукава, Канстанціна Ракасоўскага, якія правялі Берлінскую аперацыю. Экспазіцыя знаёміць таксама з работай «За вялікі рускі народ», на якой паказаны прыём у Георгіеўскай зале Крамлёўскага палаца ў гонар удзельнікаў парада, і шэрагам іншых знакавых карцін. Наведаць экспазіцыю «Героі вайны на Краснай плошчы» можна да 6 ліпеня.
mila@sb.by
Фото БЕЛТА
