У Магілёве адкрыецца XVII фестываль польскага кіно.
— Яго галоўная мэта — прадоўжыць знаёмства гараджан з кінамастацтвам суседняй краіны, — адзначыў дырэктар Дома Польскага ў Магілёве Юрый Журавовіч. — Рэпертуар фестывалю даволі разнастайны: гледачы ўбачаць як драматычныя стужкі, так і камедыі.
У спісе карцін, якія будуць прадстаўлены ў час фэсту, — «Малая Масква», «Закаханыя», «Джульета вяртаецца дадому» і іншыя. Фестываль пачнецца 22 красавіка і будзе доўжыцца чатыры дні.
