На наступным тыдні пачынаюцца вясеннія канікулы. Здавалася б, вось дык радасці дзецям. Але навіны, героямі якіх апошнім часам становяцца школьнікі, сумныя. Так, у Брэсце ў сераду прыблізна ў 13 гадзін на вуліцы Смірнова машына збіла вучня другога класа. Сведкі расказваюць, што за некалькі секунд да здарэння малы разам з іншымі дзецьмі выйшаў з аўтобуса. Ад дома яго аддзяляла вуліца. Вось толькі перабягаць яе васьмігадовы хлопчык разам з сяброўкай вырашылі не па «зебры». У выніку дзяўчынка праскочыла, а на яе спадарожніка наляцела іншамарка.
Ад удару хлопчык памёр на месцы. Вядома, што за рулём аўто сядзеў 26-гадовы жыхар Брэсцкага раёна. Ён быў цвярозы і, хутчэй за ўсё, проста не паспеў затармазіць.
З пачатку года гэта ўжо другі выпадак, калі ў аварыі гіне дзіця. Трагічная хроніка была распачата ў студзені, калі ў ДТЗ пацярпела немаўлятка. У машыне ехала маладая сям’я, 24-гадовы тата не справіўся з кіраваннем і ўляцеў у асвятляльную мачту. Пяцімесячны хлопчык, якога мама трымала на руках, быў цяжка траўміраваны. Сямнаццаць дзён урачы змагаліся за яго жыццё, але…
«У большасці аварый з удзелам дзяцей, што здарыліся ў гэтым годзе, вінаваты дарослыя, — каменціруе лічбы жахлівай статыстыкі Ганна Банадык, старшы інспектар УДАІ МУС. — Для прыкладу, у студзені—лютым у ДТЗ пацярпелі 33 дзіцяці. Толькі ў чатырох з іх малыя вінаватыя самі: двое пераходзілі дарогу ў неналежным месцы, двое — выбеглі з-за аўтобуса».
З надыходам вясны, кажуць спецыялісты, сітуацыя можа пагоршыцца. Сонца прыпякае, хлопчыкі і дзяўчынкі бягуць у двары, а там столькі машын, якія стаяць ледзве не адна на адной, што да бяды недалёка. Толькі ў сакавіку пад коламі побач з домам аказаліся двое дзяцей. Адна з пацярпелых — шасцігадовая дзяўчынка з Гродна. На шчасце, малая атрымала лёгкія траўмы, і пасля агляду дактароў бацькі адразу ж забралі яе дадому.
— У сераду ў аварыю патрапіў шасцікласнік, — кажа Алег Дук, старшы інспектар аддзялення агітацыі і прапаганды ДАІ УУС Гродзенскага аблвыканкама. – Вяртаючыся дадому з другой змены, ён пераходзіў дарогу ў праездзе паміж дварамі. З-за прыпаркаваных навокал машын вадзіцель яго не заўважыла. З пераломам нагі хлопчык знаходзіцца ў бальніцы.
Тым не менш у параўнанні са студзенем—лютым мінулага года дзеці на дарогах сталі больш уважлівымі: тады адбылося 38 аварый з удзелам непаўналетніх, загінулі пяцёра малых.
Таму нагадаць людзям пра асцярожнасць лішнім не будзе. Асабліва дарослым, якія бываюць занадта бяспечнымі. Дастаткова ўспомніць выпадак, калі ў Пухавіцкім раёне ў аварыю трапіла машына з двума непаўналетнімі ў багажніку: 26-гадовы вадзіцель дадумаўся не толькі пасадзіць у аўто восем чалавек, але і мчаць на хуткасці 120 кіламетраў у гадзіну.
Кацярына ПАНЦЯЛЕЕВА
panteleeva_katya@mail.ru