Удзел ва ўрачыстай цырымоніі прынялі вышэйшыя службовыя асобы, кіраўнікі дзяржорганаў, прадстаўнікі грамадскіх арганізацый, ветэраны, свяшчэннаслужыцелі, дыпламаты. Яны таксама ўсклалі да падножжа манумента кветкі і вянкі.
Прысутныя на плошчы Перамогі ўшанавалі мінутай маўчання памяць загінулых. У цішыні прагучала 20 удараў метранома.
Пасля выканання Дзяржаўнага гімна па плошчы ўрачыстым маршам прайшла зводная рота і аркестр ганаровай варты камендатуры Узброеных Сіл.
Аляксандр Лукашэнка пагутарыў з кіраўнікамі дыпламатычных місій, цёпла прывітаў ветэранаў Вялікай Айчыннай вайны. “Наш дагавор вы памятаеце: як мага даўжэй жыць. Нам вы вельмі патрэбныя”, — сказаў кіраўнік дзяржавы, звяртаючыся да ветэранаў. Ён пажадаў ім здароўя і шчасця і падзякаваў за падтрымку.
Старт святочным мерапрыемствам у Віцебску з нагоды Дня Незалежнасці быў дадзены на плошчы Перамогі. Каля 8 тысяч чалавек прынялі ўдзел у мітынгу і ўрачыстым ускладанні вянкоў і кветак да манумента воінам-вызваліцелям, партызанам і падпольшчыкам.
У Дзень Незалежнасці ў Гомелі адбылося святочнае шэсце ветэранаў, працоўных калектываў і грамадскасці горада.
Святочныя мерапрыемствы, прысвечаныя Дню Незалежнасці, у Магілёве пачаліся з мітынгу на легендарным мемарыяле “Буйніцкае поле”.
Урачысты мітынг у гонар Дня Незалежнасці прайшоў 3 ліпеня на плошчы Леніна ў Гродне. Мітынг прадоўжыўся ўзнагароджаннем уладальнікаў прэміі “Чалавек года Гродзеншчыны” і ўскладаннем кветак і вянкоў да Вечнага агню ў парку імя Жылібера.
3 ліпеня ў мемарыяльным комплексе “Брэсцкая крэпасць-герой” адбыўся мітынг з нагоды Дня Незалежнасці. На мітынг сабраліся ветэраны, кіраўнікі вобласці і горада, прадстаўнікі дыпламатычных ведамстваў і рэлігійных канфесій, брастаўчане і госці горада. На плошчы Цырыманіялаў прысутныя ўшанавалі памяць байцоў, якія не вярнуліся з палёў бітваў, мінутай маўчання, усклалі вянкі і кветкі да Вечнага агню.
Народныя гулянні ў Дзень Незалежнасці Беларусі на пляцоўцы каля Палаца спорту. На здымку: Горад майстроў.
Фінальнай кропкай святкавання Дня Незалежнасці стаў святочны салют. Ён быў дадзены ў Мінску і абласных цэнтрах краіны, а таксама ў Брэсцкай крэпасці.
Віншаванне Прэзідэнта Беларусі з Днём Незалежнасці
Паважаныя суайчыннікі!
Ад усёй душы віншую вас з Днём Незалежнасці Рэспублікі Беларусь.
Гэта свята па праву з’яўляецца самым дарагім у жыцці нашага народа, выклікае найвышэйшы духоўны ўздым і яднанне ўсіх, хто шануе слаўную гісторыю сваёй Радзімы і верыць у яе дастойную будучыню.
У пасляваенныя гады, нягледзячы на вялікія людскія страты, матэрыяльныя цяжкасці і нягоды, з руін і попелу была адноўлена народная гаспадарка. За гістарычна кароткі тэрмін Беларусь зрабіла магутны рывок у сваім развіцці, ажыццявіўшы мару многіх пакаленняў аб стварэнні суверэннай і незалежнай дзяржавы.
У аснове нашых дасягненняў — мужны дух, працавітасць і ўпартасць беларускага народа.
Галоўная задача для нас сёння — годна пранесці і перадаць сваім дзецям і ўнукам гістарычную эстафету, атрыманую ад пакалення пераможцаў і стваральнікаў, захаваць мір і спакой на роднай зямлі.
Шчыра жадаю вам шчасця, здароўя, поспехаў і новых працоўных здзяйсненняў на карысць Айчыны!
Аляксандр Лукашэнка
