– Нашых таленавітых сыноў не пералічыць. Ганарымся і сваімі гісторыка-культурнымі каштоўнасцямі. Найперш гэта сем цудаў, якія таксама будуць прадстаўлены на пляцоўцы «Край белых начэй», — цудатворны абраз Маці Божай Бялыніцкай, гармата часоў Айчыннай вайны 1812 года, гаючая вада ад Фядоры, жывапіс мастака Бялыніцкага-Бірулі, старажытны Запольскі крыж, каскад з сямі азёр, падзевіцкі камень-лекар, — пералічае Ірына Уладзіміраўна.
Адны з самых значных культурных падзей, прымеркаваных да Дня пісьменства, — адкрыццё Мастацкага музея імя В. К. Бялыніцкага-Бірулі і скульптурнай кампазіцыі, прысвечанай іконе Божай Маці. А яшчэ аднаўленне фрэскі, якая бярэ выток у тамтэйшым славутым манастыры.
У культурным «райдары» — Алея падарожных сталіц, дзе будуць паказаны ўсе гарады, якія некалі прымалі свята пісьменства. Удзельнікі закладуць алею і рушаць касцюміраваным шэсцем да галоўнай сцэны — там распачнецца гала-канцэрт выканаўцаў маладзёжнай і патрыятычнай песні, прысвечанай памяці Героя Савецкага Саюза Л. Лорчанкі. Тутэйшыя артысты пакажуць, на што яны здатныя. І ў гэтым рэчышчы родная зямля не падвяла. Яе выхадцы — акцёры, якія не маюць патрэбы ў прадстаўленні, — Генадзь Аўсяннікаў, Мікола Рагаўцоў, оперны спявак Юрый Гарадзецкі.
Пісьменніцкая кагорта ўшанавала флагмана вытворчасці СПК «Колхоз «Родина», напісала пра яго кнігу і плануе зрабіць семінар у вёсцы Вішаў, дзе знаходзіцца гаспадарка, сустрэцца з яе калектывам, школьнікамі і педагогамі. І, вядома, найвялікшы акцэнт арганізатараў, як мясцовых, так і сталічных, — на абраз Божай Маці Бялыніцкай. Гэта другая ікона па значнасці ў Беларусі, каранаваная, валодае гаючымі ўласцівасцямі, да яе прыхіляюцца католікі і праваслаўныя. Жыхары шчыра вераць, што яна ахоўвае іх і родныя Бялынічы. Размешчана і на гербе, таму рашэнне ўвекавечыць абраз у бронзе стала заканамерным.