Мастачка Ганна Сілівончык прадаўжае здзіўляць багаццем сваіх мастацкіх вобразаў. На гэты раз яе фантазіі віруюць вакол старажытнага народнага абрадуДобры, гарэзлівы гумар, радаснае светаўспрыманне, яркія колеры. Тонкая, нават далікатная гульня з сэнсамі і формамі, у якіх ажываюць вобразы — гэта яе, Ганны Сілівончык, творчы почырк. Адметны і жыццярадасны. У тым можна ў чарговы раз пераканацца ў галерэі “Тызенгаўз” у Гродне на выставе жывапісу Ганны Сілівончык “Дзе Купала начавала”. Дарэчы, так называецца і кніга, ілюстраваная мастачкай. Разам з адкрыцём выставы ладзілася і прэзентацыя кнігі, якую склала казачніца Алена Масла. Між тым на сайце выдавецтва “Мастацкая літаратура” пра выданне напісана коратка і ясна: “Беларускія народныя песні, калыханкі, прыказкі і пры¬маўкі ў шыкоўным аздабленні карцін таленавітай беларускай мастачкі Ганны Сілівончык — цудоўнае выданне для сямейнага чытання і падарунак усім, хто любіць прыгожае”.
Якім жа чуйная душа Ганны Сілівончык бачыць свята Купалле? Яна творыць таямнічы свет яркім і неардынарным, хоць у аснове фантазій — знаёмыя ўсім сюжэты і матывы беларускага фальклору. Тут трохі і ад лепшых узораў наіўнага мастацтва, ёсць стылізацыі пад творы мастацтва дэкаратыўна-ужытковага. З карцін праменяць гумар і сардэчнасць. Мастачка смела гуляе, эксперыментуе са старымі тэмамі, напаўняе іх новым зместам і гучаннем. І традыцыі гарманічна спалучаюцца з сучаснасцю ў яе выявах, а разам ствараюць мудрагелістую мазаіку, містычныя ўзоры знакаў і сімвалаў. Яны, нібы лялькі-матрошкі, нясуць у сабе і прыхаваныя сэнсы-значэнні — толькі ўмей расчытаць. А каму да “Тызенгаўза” не трапіць, можна завітаць на сайт http://silivonchik.ru/
У творчасці Ганны Сілівончык шмат аптымізму, жадання падзяліцца зробленым. Выставы яе карцін рэгулярна праходзяць ў Мінску, Маскве, Санкт-Пецярбургу, Кіеве ды іншых гарадах. Творы ўраджэнкі Гомеля ёсць у Мастацкім музеі Беларусі, Музеі сучаснага выяўленчага мастацтва (Мінск), Музеі сучаснага рускага мастацтва (ЗША), а таксама ў фондах Гомельскага палацава-паркавага ансамбля, Елабужскім дзяржаўным музеі-запаведніку (Расія), у прыватных зборах калекцыянераў розных краін. Што ж, яе мастацтва і сапраўды дапамагае шукаць гармонію і суладнасць у гэтым свеце. І не выпадкова ў 2009 годзе Ганна Сілівончык ушанавана медалём “Талент і прызванне” міжнароднага альянса “Міратворац”.
Іван Іванаў
На здымку:
Карціна Ганны Сілівончык “Папараць-кветка”. 2005 год.
