Каб даць старым будынкам другое жыццё, магілёўскія ўлады вырашылі заключыць дагаворы з інвестарамі.
— Гэта дазволіць і бюджэтныя сродкі зэканоміць, і праблему рэканструкцыі будынкаў у цэнтры горада вырашыць, — гаворыць начальнік аддзела жыллёва-камунальнай гаспадаркі Магілёўскага гарвыканкама Ігар Данькоў.
У гэтым годзе плануецца аднавіць пяць дамоў, большасць з якіх маюць гістарычную каштоўнасць. Напрыклад, жылым будынкам пад нумарамі 15 і 19 на вуліцы Першамайскай больш за сто год. Зразумела, што сёння ўмовы для жыцця тут зручнымі не назавеш.
— Мы прапануем інвестарам прыняць удзел у рэканструкцыі, а ўзамен атрымаць асабістую пло-шчу для сваіх патрэб за кошт мадэрнізацыі ці пашырэння будынкаў, — дадае Ігар Віктаравіч.
З дома нумар 17 па завулку Камісарыяцкім магі-ляўчан наогул перасялілі, бо ён прызнаны не прыгодным для жыцця. А дамы нумар 10 па завулку Пажарным і 33 па вуліцы Піянерскай пасля вялікага капрамонту ізноў плануецца зрабіць жылымі.
