Напярэдадні 80-годдзя з дня нараджэння класіка беларускай літаратуры Уладзіміра Караткевіча Міністэрства культуры Рэспублікі Беларусь сумесна з грамадскім аб’яднаннем “Беларускі фонд культуры” і Нацыянальнай бібліятэкай прэзентавалі новае выданне вядомай і любімай чытачамі аповесці пісьменніка, якое выдадзена на беларускай, рускай, украінскай і англійскай мовах.Падарункавае выданне “Дзікае паляванне караля Стаха” стане своеасаблівым друкаваным помнікам Уладзіміру Караткевічу і, варта быць упэўненымі, зойме пачэснае месца на паліцах бібліятэк, бо творчасць пісьменніка таго заслугоўвае.
Кніга падрыхтавана і выйшла ў кароткі тэрмін дзякуючы падтрымцы Міністэрства культуры Беларусі, фінансавай дапамозе прыватнага прадпрыемства “Неф-праект”, дызайнерскай групе Сяргея Расолькі, друкарні “Dragowicc-PL” і яе дырэктару Станіславу Быстрыньскаму (Польшча), мастакам Юрыю Якавенку, Міхасю Будавею.
На прэзентацыі кнігі “Дзікае паляванне караля Стаха” была прадстаўлена выстава асобных выданняў аповесці з фондаў Нацыянальнай бібліятэкі на розных мовах свету, а таксама кніжная выстава “Свет шчодры. Свет мяне паўторыць...”, прысвечаная 80-годдзю Уладзіміра Караткевіча. Экспазіцыя складаецца з прыжыццёвых твораў пісьменніка, мастацкіх перакладаў і кніг, прысвечаных жыццю і творчасці Караткевіча.
