Пятніца. Пяты дзень тыдня нясе ў сабе жаночы пачатак. Трэба адзначыць, што ў сукупнай характарыстыцы гэтага дня прысутнічаюць і станоўчыя адносіны (сюды можна аднесці шматлікія рэкамендацыі), і негатыўныя, якія забараняюць выконваць у гэты дзень тыя ці іншыя справы. Апроч таго, у гадавым цыкле святкаванняў пятніца карыстаецца значнай павагай, якая сведчыць аб тым, што ўяўленні пра гэты дзень зліліся ў адзіную персаніфікаваную з’яву, якая нагадвае быццам бы на самай справе існуючую чалавечую постаць. У выніку мы сталі сведкамі таго, што пятніца (грэч. — parasque) атрымала антрапаморфныя (уласцівыя жывому чалавеку) рысы і стала ўспрымацца як адна са святых заступніц усяго роду чалавечага, але перш за ўсё жанчын.
Культ Параскевы Пятніцы быў шырока распаўсюджаны ў народным асяроддзі і аформіўся ў цэлы шэраг спецыфічных маральна-этычных прадпісанняў:
- Гістарычная прыналежнасць пятніцы значным падзеям эпохі, калі хрысціянства толькі набірала моц, робіць зразумелым пажаданне ўстрымлівацца ад ежы ў цэлым або прытрымлівацца посту — тады вашы дзеці пражывуць больш доўгі век.
- Ахоўнымі характарыстыкамі пятніцы, якімі яна надзелена ў адносінах да маладых людзей, што мараць стварыць моцны і даўгавечны саюз, можна патлумачыць пажаданне купляць абутак маладой (нявесце) толькі ў гэты дзень.
- У некаторых мясцінах і сеялі, і зажыналі ў пятніцу, таму што лічылі гэты дзень самым спрыяльным.
- Разам з тым пятніца лічылася днём, у які нельга было вывозіць гной, каб скаціна не перастала вадзіцца.
- Менавіта ў пятніцу гаспадыні імкнуліся першы раз выгнаць скаціну ў поле.
- Гэты дзень лічыцца спрыяльным для пасадкі і праполкі цыбулі.
- Жаночым днём наведвання лазні здавён была пятніца.
- Каб валасы добра раслі, стрыжыце іх у першую пятніцу на малады месяц.
