Актывістаў з суполкі “Уздым” запрасілі на сустрэчу з настаўнікамі адной са школ Даўгаўпілса

Мы рабілі прэзентацыю беларускага таварыства “Уздым” у 3-й школе Даўгаўпілса. Там ёсць традыцыя: знаёміцца з этнасуполкамі, дайшла чарга і да беларусаў. А мы, як вядома, шмат увагі надаем пашырэнню беларускай культуры там, дзе жывём. Нам хочацца, каб людзі іншых нацыянальнасцяў маглі дакрануцца да багатай культуры, гісторыі, традыцый беларускага народа.


У актавай зале школы сабраліся настаўнікі. Як іх вітаць? Вырашылі пачаць з верша паэта Станіслава Валодзькі “Землякам”: у ім чуваць мелодыка нашай мовы. Намесніца старшыні суполкі Людміла Сінякова расказала, дзеля чаго створана таварыства. А я прадоўжыла аповед. Згадала, як ішло станаўленне суполкі, пра нашы творчыя гурты, якія радуюць талентамі гаражан Даўгаўпілса, жыхароў  Латгаліі і замежжа. Больш падрабязна расказала пра “Беларускі кірмаш” — вялікую штогадовую імпрэзу,  якая стала візітнай карткай Цэнтра беларускай культуры і таварыства “Уздым”. Расказваючы пра суполку, гаварылі мы і пра даваенную гісторыю жыцця беларусаў Латгаліі.

Потым спадарыня Зінаіда Сіліня,  старэйшы сябар таварыства, цікава і эмацыйна знаёміла настаўнікаў з абрадавамі беларускімі песнямі: яна чула і спявала іх у дзяцінстве — спявае і цяпер. Вытокі тых песень — ад яе родных, бабулі і матулі. Зінаіда Іванаўна спявала ўрыўкі з розных твораў, а песню “Шэры конь”, гэта візітная картка спявачкі, выканала цалкам.

Далей Людміла Сінякова прадоўжыла аповед пра дзейнасць суполкі, пра знакамітых і таленавітых людзей, якія сваёй творчасцю ўпрыгожваюць жыццё ЦБК і “Уздыма” — гэта Анастасія Сазанкова, Валянціна Абушкевіч, Мікола Навуменка, Станіслаў Валодзька, Яўген Голубеў, Галіна Жалабоўская, Надзея Паўловіч, Павел Плотнікаў. Людміла расказала і пра ўдзел сяброў таварыства ў навуковых, краязнаўчых канферэнцыях як Латвіі, так і за яе межамі. Дзякуючы намаганням Людмілы створана маладзёжная група — гэта новы і цікавы рух у жыцці суполкі. Мы знаёмілі настаўнікаў з сайтам “Уздыма” і прапанавалі яго наведваць. Там знаходзяць адлюстраванне нашы справы, праекты. Дарэчы, прэзентуючы сайт, мы і фотаздымкі паказвалі з жыцця суполкі.

Настаўнікі даведаліся, што пры таварыстве “Уздым” працуе беларуская школа. Там вучні знаёмяцца з гісторыяй і традыцыямі беларусаў, на аснове гэтага і вывучаюць беларускую мову. Для іх праводзяцца і заняткі па прыкладным мастацтве. А настаўніца Таццяна Блізнакова праводзіць і музычныя заняткі, рыхтуе тэатральныя пастаноўкі. У суполкі ёсць сяброўскія сувязі з настаўнікамі школ з Беларусі (Магілёў, Гродна), з Беларускай асноўнай школай імя Янкі Купалы, якая працуе ў Рызе. У Цэнтры беларускай культуры ў нас адкрыта народная бібліятэка, у яе фондах — кнігі, сабраныя сябрамі таварыства “Уздым”. У рэалізацыі такога каштоўнага праекта нам паспрыялі супрацоўнікі Латгальскай цэнтральнай бібліятэкі. Гаварылі мы і аб праблемах інтэграцыі беларусаў у латвійскае грамадства.

Мы паказалі відэаматэрыялы пра Беларусь, падаравалі школе буклеты, часопісы, праспекты і кампакт-дыскі пра нашу Бацькаўшчыну. Дырэктар школы Віталь Азарэвіч падзякаваў нам за цікавую сустрэчу.