На панарамных «Залатых палях» віднеецца захад над Навагрудскім узвышшам, азярына, вёска, зжатае поле, высланае рулонамі саломы. Ружовыя аблачынкі цёплага вечара — што толькі не здольныя перадаць нашы майстры пэндзля. «Пейзаж з млыном», «Ваколіца», восеньскія далі — але ўсюды ў цэнтры ўвагі сельскае жыццё, менавіта яму прысвечаны карціны.
Іван КОЗЕЛ.
Іван Козел экспануе свае палотны не ўпершыню, летась з братам Юрыем, які таксама жыве і працуе ў Мінску, зладзілі выставу да 520-годдзя Дзятлава. Наогул, на сваёй малой радзіме славутыя браты — жаданыя госці, але надзейна асталяваліся ў сталіцы. Іван каля 20 гадоў выкладае ў гімназіі-каледжы імя Ахрэмчыка. Мінск з тэатрамі і музеямі, куды хлопец пераехаў вучыцца, адразу яго зачараваў. Знайсці агульную мову з прыродай і горадам дапамаглі вядомыя мастакі Май Данцыг, Міхась Меранкоў, Барыс Аракчэеў. Стрыманая прыемная палітра закалыхвае — Козел стварае ідэальны свет, без шуму і натоўпу, з лёгкімі водгукамі імпрэсіянізму.
Віктар БАРАБАНЦАЎ.
Віктара і Івана аб’ядноўвае не толькі любоў да творчасці, але і менавіта да вясковай тэматыкі, матэрыял чэрпаюць з убачанага, а вось кампазіцыю прыдумваюць самі. Але галоўнае, у чым упэўнены, — падабраць кранальны сюжэт, такія пастараліся паказаць на выставе ў Палацы прафсаюзаў.
basikirskaya@sb.by
