«Уяўляеш, — падзялілася са мной на днях суседка, — мая Даша на ЦТ павінна будзе не рускую мову здаваць, а беларускую! А мы ж рэпетытара па рускай наймалі. Вось паўгода тэрмінова рэпеціруем ужо беларускую. Але грошы страчаныя, і час не вернеш». З суседкай я, мабыць, пагадзілася б, калі б не адно «але»: яе выпускніца-дачка плануе атрымаць дыплом філолага, але не рускай, а менавіта беларускай мовы. І лагічна было б выказаць здагадку, што да ЦТ па профільным прадмеце яна павінна быць больш чым гатовая.
Так, у гэтую прыёмную кампанію ў параўнанні з мінулай пералік экзаменаў, абавязковых для паступлення на некаторыя спецыяльнасці, зменены. А дзесьці, як, напрыклад, у выпадку са спецыяльнасцю «фармацыя», зменены рэйтынг прадметаў: цяпер тут першым профільным будзе хімія, а другім — біялогія, тады як па іншых медыцынскіх спецыяльнасцях наадварот: спачатку — біялогія, а потым — хімія. Ці так ужо гэта прынцыпова?
На думку прарэктара па вучэбнай рабоце БДУІР Барыса Нікульшына, гэтая сітуацыя не крытычная, каб уплываць на карціну з паступленнем.
У тэхнічнай ВНУ таксама памяняліся месцамі некаторыя абавязковыя экзамены, пры тым, што пералік іх застаўся ранейшым. «Галоўнае — гэта сума балаў, якую набярэ абітурыент на ЦТ, — перакананы ён. — Профільны прадмет і адзнака, атрыманая па ім, будуць важныя толькі ў тым выпадку, калі нам прыйдзецца выбіраць паміж двума абітурыентамі, якія набралі аднолькавую суму балаў. Але, паверце, гэта бывае вельмі і вельмі рэдка».
Развейваюць мае асцярогі з нагоды навін уступнай кампаніі і ў БДПУ імя М. Танка. Тут змены закранулі тых, хто паступае на спецыяльнасць «пачатковая адукацыя»: калі раней здавалі экзамены па мове, гісторыі Беларусі і матэматыцы, то зараз апошні прадмет заменены на біялогію. «Мы праводзілі сустрэчы з абітурыентамі, дні адчыненых дзвярэй, — кажа адказны сакратар прыёмнай камісіі БДПУ імя М. Танка Сяргей Васілец, — і высветлілі, што такая замена абітурыентам толькі на карысць. Яны задаволеныя, паколькі такі ж набор уступных выпрабаванняў распаўсюджваецца на пяць факультэтаў. Гэта датычыцца такіх спецыяльнасцей як псіхалогія, дэфекталогія, сацыяльная педагогіка і іншыя. А значыць, пашыраюцца магчымасці абітурыентаў».
