Выданне творчай спадчыны народнага пісьменіка Беларусі Васіля Быкава распачало расійскае выдавецтва.
Як праінфармаваў на прэзентацыі першых 6-ці тамоў генеральны дырэктар выдавецтва “Время” Барыс Пастарнак, яны спецыялізуюцца на выданні толькі якаснай літаратуры. Імкнуцца данесці да чытачоў зборы твораў знакавых рускіх пісьменнікаў, мысліцеляў XX стагоддзя і сучаснасці. Цяпер у рабоце, напрыклад, 30-томнік Аляксандра Салжаніцына, 8-томнік Андрэя Сахарава, 10-томнік Фазіля Іскандэра і творы іншых аўтараў. Падрыхтавана першае поўнае выданне Андрэя Платонава.
У такім шэрагу, лічыць Б.Пастарнак, ганаровае месца належыць і Васілю Быкаву: ён сваімі перакладамі, публікацыямі ў рускіх часопісах, выдавецтвах даўно пра тое паклапаціўся. Пачынаючы работу, выдаўцы спачатку меркавалі прозу пісьменніка выдаць толькі на рускай мове. Звярнуліся ў Мінск, у Саюз беларускіх пісьменнікаў, з прапановай аб супрацоўніцтве. Сустрэчная прапанова была такая — рыхтаваць паралельна два зборы твораў: адзін — на беларускай, другі — на рускай мовах. Так і дамовіліся. “Гэтая мадэль выдання больш зручная, і ў выніку больш эфектыўна працуе творчая група,” — удакладніў Барыс Пастарнак. Дарэчы, у яе склад сярод іншых увайшла і Ірына Уладзіміраўна, удава Васіля Быкава.
Чорны, белы, чырвоны, шэры... Гэтыя колеры дызайна вокладкі Збору твораў кантрасна, вобразна, шматзначна прадстаўляюць знакамітага аўтара чытачам. У яго творах, як вядома, шмат пакутаў і болю, а таксама вялікай любові да людзей. Першыя шэсць тамоў, вынік плённага супрацоўніцтва беларусаў і расіян, прыхільнікі таленту Васіля Быкава змаглі набыць на нядаўняй Міжнароднай кніжнай выставе-кірмашы, якая прахо-дзіла ў Мінску.
Беларускамоўнае выданне робіцца з улікам “плана Быкава” — той паслядоўнасці падачы твораў, якой яна бачылася самому аўтару. На беларускай мове поўны Збор твораў Васіля Быкава выйдзе ў 14-ці тамах. “У Екацерынбургу, дзе друкуецца тыраж, на кнігі таксама ёсць попыт — і там жывуць беларусы,” — гаварыў кіраўнік выдавецтва, які, дарэчы, нарадзіўся ў Мінску. Дарэчы, у бібліятэкі Беларусі камплекты выдання будуць перадавацца бясплатна.
Збор твораў на рускай мове ўжо таксама гатовы да друку. Праўда, ён задуманы карацейшым, у 8-мі тамах. Тым не менш гэта будзе поўны збор прозы пісьменніка.
Іван Ждановіч
14 тамоў болю і любові
Выданне творчай спадчыны народнага пісьменіка Беларусі Васіля Быкава распачало расійскае выдавецтва