“...І над рэйхстагам узнімалі сцяг”
У час Вялікай Айчыннай вайны паэт Паўлюк Прануза
служыў у зенітнай артылерыі, прымаў удзел у баях на Бранскім, Цэнтральным і 1-м Беларускім франтах. Дэмабілізаваўся ў 1945-м. Узнагароджаны ордэнамі Айчыннай вайны ІІ ступені, Славы ІІІ ступені, медалямі. У час вайны яго вершы друкаваліся ў многіх франтавых і армейскіх газетах. Амаль два дзесяткі зборнікаў паэзіі выйшлі ў свет у пасляваенныя гады. Адзін са сваіх вершаў Павел Кузьміч прапануе чытачам газеты “Рэспубліка”.
Рукі салдата
Яны даўно сваю зрабілі справу,
Апалены ў пажарах, у баях.
Ад смерці выратоўвалі Варшаву
І над рэйхстагам узнімалі сцяг.
Яны кладуць у новы мур цагліны,
Цяпер на іх, шурпатыя, зірні.
На іх ляглі няўмольныя маршчыны,
А жылы, нібы дуба карані.
Кранаюць струны – тонка льюцца гукі,
Саджаюць дрэўцы – кволыя яны.
Гадуюць, песцяць дарагіх унукаў,
Аберагаюць чуйныя іх сны.
Яны без стомы. Справаю заняты.
Мой суайчыннік любы, дарагі!
Ты помні рукі воіна-салдата,
Што неслі пераможныя сцягі.