Дзяржава ўзяла пад ахову гістарычны цэнтр Мінска
Спадчына беларускай сталіцы ўзята пад заканадаўчую «апеку». Міністэрства культуры зацвердзіла праект зон аховы гісторыка-культурнай каштоўнасці — «Гістарычны цэнтр Мінска», паведамляе БЕЛТА. Цяпер дакладна вызначаны парадак утрымання гістарычна важных раёнаў горада. Парушальнікі могуць быць прыцягнуты як да адміністрацыйнага, так і да крымінальнага пакарання.
Паводле слоў начальніка Упраўлення па ахове гісторыка-культурнай спадчыны і рэстаўрацыі Мінкультуры Ігара Чарняўскага, агульная плошча гістарычных раёнаў Мінска — 76,9 га. Дакументам устаноўлены ахоўная зона, зона рэгулявання забудовы, зона аховы ландшафту і зона аховы культурнага слоя.
Ахоўная зона супадае з тэрыторыяй гістарычнага цэнтра Мінска. На гэтай тэрыторыі забараняецца будаўніцтва аб’ектаў, якія пераўзыходзяць па сваіх параметрах будынкі XVI—XX стагоддзяў, ажыццяўленне дзейнасці, якая парушае захаваную планіровачную структуру гістарычнага цэнтра горада, а таксама правядзенне земляных работ без нагляду археолагаў.
Зона рэгулявання забудовы размяшчаецца на тэрыторыі кварталаў паміж вуліцай Інтэрнацыянальнай і праспектам Незалежнасці, уздоўж вуліц Я. Купалы і Раманаўская Слабада. Тут дазволена ўзвядзенне будынкаў і збудаванняў, якія забяспечваюць захаванне гістарычнага сілуэта Мінска. Іх максімальная вышыня не павінна перавышаць 11 метраў уздоўж вуліцы Інтэрнацыянальнай і 26 метраў — уздоўж праспекта Незалежнасці. На гэтай тэрыторыі рэкамендуецца аднаўленне страчаных дамінант, у прыватнасці касцёла дамініканскага кляштара (рог вуліц Энгельса і Інтэрнацыянальнай).
Аднак сёння ў зоне рэгулявання забудовы ўжо знаходзіцца шэраг будынкаў, якія «не ўпісваюцца» ў агульны гістарычны сілуэт. «На мой погляд, падобная архітэктура павінна з’яўляцца не ў самім гістарычным цэнтры, а на дастатковай адлегласці ад яго», — сказаў Iгар Чарняўскі.
Яшчэ адно новаўвядзенне — зона аховы ландшафту. Яна ўстаноўлена ўздоўж ракі Свіслач з мэтай захавання водна-зялёнага дыяметра на тэрыторыі, якая прылягае да гісторыка-культурнай каштоўнасці. Зона аховы ландшафту ахоплівае тры ўчасткі: уздоўж Свіслачы да Палаца спорту і банка «Масква-Мінск», сквер перад будынкам Нацыянальнага акадэмічнага Вялікага тэатра оперы і балета, тэрыторыю сквера ў раёне вуліц Няміга — Валадарскага — Гарадскі Вал. Тут дазваляецца правядзенне работ па добраўпарадкаванні, пракладка неабходных інжынерных камунікацый, правядзенне мерапрыемстваў па захаванні і аднаўленні расліннасці. Аднак забаронена ўзвядзенне новых будынкаў.
Зона аховы культурнага слоя ахоплівае значную частку мясцовасці, якая супадае з тэрыторыяй горада Мінска XIX стагоддзя. Самымі важнымі яе элементамі з’яўляюцца Мінскае замчышча і тэрыторыя Верхняга горада. Пры выкананні земляных работ на тэрыторыі зоны неабходна забяспечыць правядзенне археалагічных даследаванняў і рэалізацыю мер па ахове археалагічных аб’ектаў. «Перш за ўсё, культурны пласт— гэта каштоўнасць для навукі, гісторыі, які змяшчае важныя артэфакты для асэнсавання мінулага», — заўважыў спецыяліст.
