Палігон змяшчае да 80 тысяч кубаметраў снегу.За кожным раёнам замацавана свая снежная звалка. З пачатку года палігоны Мінска прынялі 325 тысяч кубічных метраў снегу. Месцы для пляцовак «Рэмаўтадары» выбіраюць разам з эколагамі: у Фрунзенскім раёне снежная звалка размяшчаецца на вуліцы Лынькова, у Цэнтральным — на вуліцы Будслаўскай, у Першамайскім — на Уручскай, у Савецкім — у раёне вуліц Карастаянавай і Алешава, у Кастрычніцкім раёне — на вуліцы Кіжаватава. З вуліц Ленінскага, Заводскага і Партызанскага раёнаў у асноўным снег дарожнікі вязуць на снегаплавільную станцыю, што на вуліцы Машынабудаўнікоў. Побач са станцыяй — самая магутная каналізацыйная станцыя ў краіне і адна з самых магутных у Еўропе. 70 працэнтаў сцёкавых вод горада яна перапампоўвае на ачышчальныя збудаваннi. Частка вод накіроўваецца на фарсункі снегаплавілкі. Такім чынам, каналізацыя сваім цяплом плавіць снег.
У Маскоўскім раёне снежная звалка знаходзіцца на вуліцы Сямашкі. Цяпер гэта голае поле — на тэрмометры плюс. Толькі з краю звалкі засталіся невысокія насыпы снегу, якія не паспелі растаць. Горкі маюць адценні ад брудна-шэрага да попельна-чорнага, што лагічна — сабралі снег з вулічна-дарожнай сеткі. Галоўны інжынер ДУ «Рэмаўтадар» Маскоўскага раёна Сяргей Бяльковіч расказвае падрабязней:
— Палігон змяшчае да 80 тысяч кубаметраў снегу. Для параўнання: адзін даверху гружаны самазвал МАЗ — 16 кубаметраў. Можаце сабе ўявіць, колькі снегу тут змесціцца. Уніз па схіле — два водаадводы. Расталы снег сыходзіць праз іх па сістэме каналізацыі на ачышчальную станцыю. Каб снег «не ўцёк» за межы палігона, мы робім абвалоўку, насыпы па перыметры палігона.
Снег на звалку прывозяць і арганізацыі раёна, па дамове. Палігон ахоўвае вартаўнік, каб у нікога не ўзнікла жадання пад снежнымі горамі схаваць свае бытавыя адходы. Акрамя таго, Мінскі гарадскі камітэт прыродных рэсурсаў назірае, каб на звалкі везлі толькі снег.
Восенню спецыялісты Цэнтральнага навукова-даследчага інстытута комплекснага выкарыстання водных рэсурсаў узялі пробы грунту на палігоне Маскоўскага раёна і ўстанавілі, што канцэнтрацыі нафтапрадуктаў, медзі, свінцу, цынку і хларыд-іона ў гэтым месцы дапушчальныя.
На гэты палігон возяць снег ужо не першы год, вакол вырас новы спальны раён. Горад разрастаецца. Напрыклад, у Кастрычніцкім раёне да снежнай звалкі падступае будоўля лініі метро, таму цалкам верагодна, што ў наступным годзе давядзецца пераносіць пляцоўку. Будучае месца павінна быць за межамі водаахоўнай зоны.
Цалкам увесь снег на палігонах растае дзесьці да красавіка. Тады ж дарожнікі зробяць на іх рэкультывацыю зямлі: здымуць яе верхні пласт і адвязуць яго на палігон «Трасцянецкі».
ikras@sb.by
