Магілёву прысвячаецца
Нацыянальны банк Рэспублiкi Беларусь 12 лiпеня выпусцiў у абарачэнне памятныя манеты, прысвечаныя г.Магiлёву, серыi “Гарады Беларусi”: срэбную — намiналам 20 рублёў i медна-нiкелевую — намiналам 1 рубель.
На пярэднiм баку манет размешчаны: у крузе, абведзеным геаметрычным арнаментам, – рэльефны вiдарыс Дзяржаўнага герба Рэспублiкi Беларусь, пад iм – год чаканкi (на срэбнай – вага каштоўнага металу ў чысцiнi i проба сплаву); па крузе надпiсы: у верхняй частцы – РЭСПУБЛІКА БЕЛАРУСЬ, у нiжняй – ДВАЦЦАЦЬ РУБЛЁЎ на срэбнай i АДЗІН РУБЕЛЬ – на медна-нiкелевай.
На адваротным баку размешчаны: у цэнтральнай частцы – рэльефная выява панарамы Магiлёва з гравюры XVIII стагоддзя, злева ўверсе – рэльефнае адлюстраванне герба абласного цэнтра, па крузе надпiсы: уверсе справа – МАГІЛЁЎ; унiзе злева – ГАРАДЫ БЕЛАРУСІ.
Манеты адчаканены: срэбная – якасцю “пруф”, медна-нiкелевая – “пруф-лайк”, тыражом па 2000 штук кожная.
Гэтыя памятныя манеты з’яўляюцца законным плацёжным сродкам Рэспублiкi Беларусь, абавязковым да прыёму па намiнальным кошце пры ўсiх вiдах плацяжоў без усялякiх абмежаванняў.