Больш за 100 айчынных мастакоў прымуць удзел у Першым Мінскiм трыенале
23 лістапада ў Нацыянальным выставачным цэнтры «БелЭкспа» ўрачыста адкрыецца Першы Мінскi трыенале сучаснага мастацтва.
Экспазіцыя прадставіць найбольш актуальныя і прагрэсіўныя з’явы мастацтва Беларусі за апошнія 20 гадоў. Праз разнастайныя формы і напрамкі сучаснага мастацтва выстаўка пазнаёміць наведвальнікаў з жывапісам, графікай, скульптурай, фатаграфіяй, тэатрам, модай, інсталяцыямі, дызайнам і музыкай. Упершыню ў Беларусі сучаснае канцэптуальнае мастацтва будзе прадстаўлена ў такім грандыёзным маштабе.
У выстаўцы прымуць удзел больш за 100 мастакоў з усіх рэгіёнаў нашай краіны. Чакаецца прыезд замежных гасцей з Украіны, Расіі, Сербіі, што будзе спрыяць наладжванню міжнацыянальных партнёрскіх сувязей і дзелавых зносін у галіне культуры і мастацтва.
У праграме трыенале запланаваны круглыя сталы і майстар-класы, творчыя сустрэчы з мастацтвазнаўцамі, крытыкамі і аўтарамі работ, канцэрты электроннай музыкi, паказы авангардных модных калекцый, відовішчныя перформансы, выступленні эксперыментальных тэатраў.
Першы Мінскi трыенале будзе працаваць да 9 студзеня.
