Паўстала праблема рэалізацыі бульбы ў замежжа. Экспарт яе скараціўся да 300 тысяч тон. Але для бульбяной прадукцыі рынак збыту неабмежаваны. Так што перспектыва развіцця галіны –ў перапрацоўцы сыравіны і вытворчасці насення бульбы. У рэестр унесена каля 150 сартоў, з іх трэцяя частка айчынныя. Папулярныя сарты «тэму», «лошніцкі», «аганёк», «беларускі ранні» дапоўніў сорт «журавінка». Пятую частку палеткаў засявалі ім. У апошнія гады на першы план выйшлі сарты сталовай бульбы «брыз», «скарб», «вектар», «першацвет», «маніфест», «рубін», «гарантыя», «дэльта»…
Некалькі гадоў таму сярэдняя ўраджайнасць па рэспубліцы перавышала 230 цэнтнераў клубняў з гектара. Потым паднялася да 270, а сёлета перавысіла 300 цэнтнераў з гектара…
Генетыка мае сваю мяжу. Важна адчуваць яе і не пераходзіць чырвоную лінію. У апошнія гады атрымала шырокае развіццё арганічнае земляробства. Пры апрацоўцы пасеваў прэпаратамі ад шкоднікаў і пустазелля частка хімічных рэчываў асядае на ўраджаі. Папулярным стала выкарыстанне седэратаў: пасеваў рэдзькі маслічнай, лубіна, гарчыцы, рапса, азімага жыта. Гэта дае магчымасць замяніць да 40 тон арганікі на гектар. Заворваюць седэраты звычайна ў час цвіцення, а лепш, калі з’яўляецца насенне. Яно асыпаецца і да восені прарастае. Удвая павышаецца ўрадлівасць глебы. Выкарыстанне седэратаў дазваляе атрымліваць экалагічна чыстую прадукцыю.
