Отдых без барьеров: этим летом на Минском море откроется первый в стране инклюзивный пляж

Да жніўня на Мінскім моры з’явіцца першы ў краіне пляж для людзей з абмежаванымі магчымасцямі. На абранай пляцоўцы ў гэтыя спякотныя дні сабраліся каля 50 інвалідаў-калясачнікаў — гатавалі шашлыкі, каталіся на гідрацыклах і абмяркоўвалі, чаго ім пакуль не хапае для паўнавартаснага пляжнага адпачынку. Пра тое, як неўзабаве зменіцца бераг Заслаўскага вадасховішча, расказаў карэспандэнту «Р» аўтар праекта інклюзіўнага пляжа.

Валянціна ГАПОН: «Рада тут знаходзіцца, бо так хочацца адпачыць у спякотныя летнія дзянькі на прыродзе ля вады».

Зручнае месца для адпачынку

Ідэя арганізаваць пляж для людзей з абмежаванымі магчымасцямі на Мінскім моры прыйшла Дзя­нісу Васілевічу, інструктару па актыўнай рэабілітацыі Рэспублі­канскай асацыяцыі інвалідаў-калясачнікаў:

— Я бачыў, наколькі папулярныя такія пляжы, напрыклад, у Расіі і Украіне. Зразумеў, што трэба стварыць падобнае месца і ў нас. Гэта будзе карысна для людзей з інваліднасцю, якія з-за сваіх асаблівасцей і з-за адсутнасці адпаведных умоў адмаўляюцца выйсці з зоны камфорту. А такіх у нас нямала: у краіне пражывае больш за 565 тысяч людзей з інваліднасцю. На тэрыторыі Мінска і Мінскай вобласці колькасць людзей з інваліднасцю большая, чым у іншых рэгіёнах. Па нашых даных, у Мінскім рэгіёне жывуць каля 120 тысяч людзей з рознымі тыпамі інваліднасці.

Свой праект Дзяніс Васілевіч прадставіў на конкурсе Social Weekend і выйшаў у фінал, атрымаў­шы падтрымку мецэнатаў. Задумку рэалізуюць у партнёрстве з Рэспубліканскай асацыяцыяй інвалідаў-калясачнікаў.

Лакацыя — 9-ы пляж Заслаўскага вадасховішча — выбрана невыпадкова: тут спадзістая мясцовасць, зручны ўваход у ваду, у крокавай даступнасці аўтамабільная паркоўка і прыпынак грамадскага транспарту. Але пакуль пляж інклюзіўным не назавеш — наперадзе нямала работы. У бліжэйшы час будаўнікі пракладуць драўляныя дарожкі, па якіх змогуць камфортна рухацца інваліды-калясачнікі і мамы з дзіцячымі каляскамі. З’явяцца і поручні для бяспечнага спуску ў ваду людзей з аслабленым зрокам, пажылых і цяжарных жанчын. У планах — узвесці пантон з шэзлонгамі, адкуль можна будзе рыбачыць і садзіцца на водныя атракцыёны, і адкрыць пляцоўку для крос-фіту. Акрамя таго, для наведвальнікаў з абмежаванымі магчымасцямі неабходна абсталяваць спецыяльныя кабінкі для пераапранання з пандусамі і прыбіральні. Пляж стане зручным месцам адпачынку для маламабільнай катэгорыі нашых грамадзян: пажылых, цяжарных жанчын, мам з маленькімі дзецьмі, людзей з траўмамі і інваліднасцю.

Экстрэмальныя забавы

— Дзяніс абраў выдатнае месца, — дзеліцца ўражаннямі старшыня Мінскай аб’яднанай арганізацыі ГА «Рэспубліканская асацыяцыя інвалідаў-калясач­нікаў» Валянці­на Гапон. — Без дапамогі атрым­ліваецца рухацца на калясцы па пляжы, таму што мясцовасць спадзістая. Таксама сюды нас без праблем можа пры­вез­ці сацыяльнае таксі. Усе вель­мі рады сёння тут знахо­дзіцца, бо так хочацца адпачыць у спякотныя летнія дзянькі на прыродзе ля вады. У горадзе гэта зрабіць практычна немагчыма! Да верасня мы плануем арганізаваць яшчэ чатыры такія пікнікі, якраз бу­дзем тэсціраваць новае абсталяванне. Дзяніс выдатна ведае, як усё трэба ўладкаваць. Яго маці — інвалід-калясачнік, ён рос у нашым асярод­дзі, разумее ўсе нашы патрэбы.

У праграме цяперашняга турыстычнага злёту былі і экстрэмальныя забавы — гідрацыкл, водныя цюбінгі і SUP-дошкі. Хутка тут можна будзе паплаваць на байдарках.

— Такі адрэналін! Уражанняў потым на цэлы год, — дзеліцца Валянціна Гапон, якая вырашыла пакатацца на «ватрушцы».

На гэтую забаву мне страшнавата было нават глядзець з берага — цюбінг, падскокваючы, носіцца па воднай роўнядзі на вар’яцкай хуткасці. Разлічана «ватрушка» на дваіх «пасажыраў»: здаровага чалавека, які будзе сачыць за бяспекай, і экстрэмала-калясачніка. У чарзе на атракцыён я пазнаёмілася і з бясстрашнай пенсіянеркай Людмілай Галась. Для яе такі экстрым — дробя­зі. Не маючы магчымасці хадзіць, Людміла ўжо прыгала з парашутам і аб’ездзіла палову свету — толькі вярнулася з Ізраіля.

За рулём гідрацыкла — Віктар Захар’еў. Ён стаў першым у краіне фітнес-трэнерам у інваліднай калясцы, а таксама паспяхова здаў на кіраванне гідрацыклам. Назіраючы за тым, як ён удала вядзе аквабайк, не падумаеш, што магчымасці маладога чалавека неяк абмежаваны.

— Інклюзіўны пляж стане месцам, дзе чалавек з інваліднасцю зможа цікава правесці час і пераканацца ў тым, што для яго няма нічога немагчымага, — упэўнены Дзяніс Васілевіч.

Бюджэт праекта складае 12 тысяч рублёў.

matuzova@sb.by

Фота аўтара