Минск
+10 oC
USD: 2.04
EUR: 2.26

Как бывший барабанщик с помощью господдержки открыл автосервис

Поспех пад капотам

Таленавітыя людзі талена­вітыя ва ўсім. Так лічыць жыхар горада Бярозаўка Юрый Александрук. І небес­падстаўна. Аддаўшы частку свайго жыцця музыцы, з дапамогай дзяржпадтрымкі ён асвоіў новую прафесію і адкрыў сваю справу — аўтасэрвіс. Зараз да былога барабаншчыка асабістыя аўто на «лячэнне» прывозяць не толькі жыхары роднага горада, але і бліжэйшых населеных пунктаў. У чым сакрэт папулярнасці яго аўтамайстэрні, даведвалася карэспандэнт «Р».

Усё гэтая музыка

Пасля заканчэння школы Юрый двойчы спрабаваў атрымаць вышэйшую адукацыю, але, паступіўшы ў ВНУ, расчароўваўся і кідаў вучобу. У тыя гады ён быў адданы толькі музыцы: яшчэ ў школе іграў на барабаннай устаноўцы ў мясцовай групе. А потым восем гадоў адпрацаваў на шклозаводзе «Нёман» адміністратарам вакальна-інструментальнага ансамбля «Шкляры».

У аўтасэрвісе Юрыя АЛЕКСАНДРУКА кліентаў хапае. Прыязджаюць нават са сталіцы.
Фота з архіва героя публікацыі
— З гэтым заслужаным аматарскім калектывам мы аб’ездзілі ўсю Беларусь, выступалі з канцэртамі і ў гарадах блізкага замежжа, — распавядае Юрый Іванавіч. — Станавіліся дыпламантамі і лаўрэатамі розных фестываляў і конкурсаў.

У вольны час ён прападаў у гаражы, які калісьці набыла ў грамадзянскім кааператыве яго маці. Сябры, якія бачылі, як яму падабаецца вазіцца з аўтамабілямі, не раз прапаноўвалі заняцца рамонтам машын. Але Юрый заўсёды спасылаўся на адсутнасць спецыяльнай адукацыі.

— Потым ад знаёмых даведаўся, што на «біржы працы» можна вывучыцца на аўтаслесара, — працягвае Юрый Александрук. — Калі звярнуўся, там якраз набіралі групу. У выніку, правучыўшыся паўгода, атрымаў пасведчанне.

Паралельна ён распрацаваў біз­нес-план для атрымання субсідыі на адкрыццё ўласнага аўтасэрвіса. Камісія яго зацвер­дзіла і ў канцы 2017 года выдзе­ліла сродкі для арганізацыі прад­прымальніцкай дзейнасці.

— На гэтыя грошы купіў пад’ёмнік, — успамінае суразмоўнік. — Бясплатная адукацыя і субсідыя ад дзяржавы сталі для мяне штуршком да дзеяння, добрым стартам. Але сваю аўтамайстэрню ў гаражы адкрыў толькі ў маі 2018 года. Да гэтага часу рабіў там рамонт.

Перадай іншаму


Пра тое, што ў гаражным кааператыве з’явілася аўтамайстэрня, людзі даведаліся задоўга да яе адкрыцця. Спрацавала сарафаннае радыё, бо спачатку Юрый рамантаваў машыны сяброў і сваякоў, тыя расказвалі пра гэта сваім знаёмым. Такім чынам, кола кліентуры паступова пашыралася.

— У нас горад невялікі, усе адзін аднаго ведаюць. Цяпер практычна ў кожнай сям’і ёсць аўтамабіль. Старыя іншамаркі ламаюцца. Часта людзі спрабуюць спачатку самі адрамантаваць, а потым, калі не атрымліваецца, прыязджаюць да мяне. Ведаюць, што за сваю працу ручаюся, даю гарантыю. Профіль работы аўтасэрвіса шырокі. Але ў асноўным рамантуем падвескі, мяняем падшыпнікі.

У сакавіку гэтага года Юрый узяў аднаго работніка на чвэрць стаўкі і заключыў дагавор з «бір­жай працы», дзе размясціў дзве вакансіі.

— Два маіх пляменніка, як і я, прайшлі там навучанне, атрымалі «пад’ёмныя» і з другога мая афіцыйна ў мяне працаўладкаваны, — не без гонару гаворыць прадпрымальнік.

З пашырэннем штата Юрый Александрук задумаўся аб добра­ўпарадкаванні аўтасэрвіса. Цяпер тут ёсць прыбіральня, душ і пакой адпачынку. Імкнецца, каб знешні выгляд работнікаў і самой майстэрні быў прэзентабельным.

— Працуем шэсць дзён на тыдзень. Кліентаў хапае. Прыязджаюць нават з Мінска, таму што ведаюць, што, па-першае, у нас танней, чым у сталіцы, па-другое, не падманем і заменім менавіта тыя запчасткі, якія неабходна, — сцвярджае суразмоўнік.

Канкурэнтаў у Бярозаўцы ў Юрыя Іванавіча раз, два і аблічыўся. Чаму? Кажа, што бізнес не надта прыбытковы.

— Мне проста падабаецца гэтым займацца. Мая малодшая дачка, урач-тэрапеўт, дапамагае людзям. Сваю працу я параўноўваю з яе, бо да мяне таксама звяртаюцца па дапамогу, — разважае прадпрымальнік. — Памятаю, як перад адкрыццём аўтасэрвіса многія не разумелі, смяяліся з мяне, маўляў, як гэта — музыкант рамантуе машыны? А я казаў: «Пачакайце і самі ўсё ўбачыце». Я ўсім раю не баяцца цяжкасцей, вучыцца чамусьці новаму. Калі адчуваеце ў сабе сілы, то чаму б і не? Трэба паспрабаваць!

КАМЕНТАРЫЙ

Юрый КЕЙКО, начальнік аддзела садзейнічання занятасці ўпраўлення па працы, занятасцi i сацыяльнай абароне Лідскага райвыканкама:

— У 2018 годзе субсідыю для арга­нізацыі прад­прымальніцкай дзейнасці ў Лідскім раёне атрымалі 19 беспрацоўных. На 1 мая гэтага года ўжо выдзелены субсідыі 8 беспрацоўным, і ў бліжэйшы час камісіяй будзе разгледжана магчымасць выдзялення грашовых сродкаў у дачыненні да 9 грамадзян, якія скончылі па накіраванні службы занятасці бясплатныя курсы асноў прад­прымальніцкай дзейнасці. Часцей за ўсё арганізуецца дзейнасць у сферы будаўнічых паслуг, рознічнага гандлю, паслуг грузавога аўтамабільнага транспарту, работ па рамонце і тэхнічным абслугоўванні аўтамабіляў.

Субсідыя прадастаўляецца ў памеры 11-кратнай велічыні бюджэту пражытачнага мінімуму. У цяперашні час выплата складае 2464,22 рубля. Беспрацоўным, зарэгістраваным па месцы жыхарства ў малых гарадах і раёнах з высокай напружанасцю на рынку працы, пералік якіх вызначаецца мерапрыемствамі па рэалізацыі (выкананні) дзяржаўнай праграмы садзейнічання занятасці насельніцтва, а таксама ў сельскіх населеных пунктах субсідыя прадастаўляецца ў памеры 15-кратнай велічыні БПМ  (3360,30 рубля).

Плануецца, што ў гэтым годзе субсідыю для арганізацыі прадпрымальніцкай дзейнасці ў Лідскім раёне атрымаюць не менш як 23 беспрацоўныя.


Полная перепечатка текста и фотографий запрещена. Частичное цитирование разрешено при наличии гиперссылки.
Заметили ошибку? Пожалуйста, выделите её и нажмите Ctrl+Enter
Загрузка...