Дзень беларускага пісьменства, які святкуецца ўжо ў дваццаць другi раз, у гэтым годзе праходзіў на Гродзеншчыне. Дарэчы, Шчучын сабраў каля 10 тысяч гасцей. На свята з’ехаліся выдаўцы, пісьменнікі і юныя чытачы, а таксама дзеячы культуры з Расіі, Украіны, Таджыкістана, Літвы, Латвіі, Азербайджана, Казахстана, Чарнагорыі і іншых краін.
...I сярэднявечча ажыло
Прычын наведаць літаратурную сталіцу краіны ў першыя выхадныя восені было мноства. Па-першае, на свае вочы ўбачыць палац князёў Друцкіх-Любецкіх, лепшы ўзор пераходнага перыяду ад барока да класіцызму. Раніцай 6 верасня каля двайніка рэзідэнцыі французскіх каралёў – палаца Малы Трыанон на тэрыторыі Версаля – сабраўся шматтысячны натоўп. Усе гэтыя людзі марылі прыняць удзел ва ўрачыстым адкрыцці помніка архітэктуры пасля рэканструкцыі. Нагадаем, што палац чакаў гэтага больш за дзесяцігоддзе. Толькі цяпер, адрамантаваны і абноўлены, ён ва ўсёй красе паўстаў перад наведвальнікамі.
Віктар Лісковіч, намеснік старшыні Гродзенскага аблвыканкама, урачыста абвясціў, што ў палацы ў далейшым будуць займацца юныя таленты, а таксама размесцяцца музей і канферэнц-залы. Ірына Дзегцярова, дырэктар Палаца творчасці дзяцей і моладзі, падзякавала за такі каштоўны падарунак падрастаючаму пакаленню Гродзеншчыны. А міністр адукацыі Міхаіл Жураўкоў выказаў надзею, што тут выгадуецца яшчэ не адно пакаленне знакавых для краіны талентаў. У цырымоніі адкрыцця палаца Друцкіх-Любецкіх пасля рэканструкцыі таксама прынялі ўдзел намеснік кіраўніка Адміністрацыі Прэзідэнта Ігар Бузоўскі, намеснік прэм’ер-міністра Беларусі Міхаіл Русы, міністры інфармацыі і культуры Лілія Ананіч і Барыс Святлоў, а таксама губернатар Гродзенскай вобласці Уладзімір Краўцоў.
Палац па-сапраўднаму здзівіў. Памяшканні, пабудаваныя ў канцы XIX стагоддзя, зноў набылі былую прыгажосць. Атмасферу эпохі князёў госці свята яшчэ больш адчулі з дапамогай тэатральных пастановак, якія разгарнуліся на тэрыторыі гістарычнага помніка. Iх арганізавалі ўдзельнікі клубаў сярэднявечнай культуры з Ліды, Навагрудка і Гродна.
«Нахіліся, ухваціся за падол і цягні ўверх», – «князь» дапамагае хлопчыку зняць цяжкую кальчугу. Знаёмлюся. Аказалася, майго суразмоўцу, які выглядае вельмі незвычайна і прыцягвае ўвагу прахожых, завуць Мікалай Шаўчэнка. «Касцюм мой – з лідскага рыцарскага клуба. Гэта дакладная копія ўбрання канца XIV – пачатку XV стагоддзя, так званая пруская мода. Вобраз мы стваралі па крупінках. Для найбольшай дакладнасці старанна вывучалі доследы археалагічных раскопак, старажытныя выявы, кнігі і летапісы», – расказвае Мікалай.
Побач з намі – нябедны гараджанін пачатку XV стагоддзя. Разглядаю вобраз Юрыя Мандрыка: доўгая сукня са шчыльнай тканіны, за скураным поясам замацаваны срэбны кубак, рука цвёрда трымае сярэдневяковую зброю. Пагутарыць з гэтым тэатральным персанажам атрымалася нядоўга – яго апанаваў чарговы натоўп жадаючых сфатаграфавацца.
Аўтара!
Рухаемся далей разам са святочным шэсцем да галоўнай сцэны Шчучына. Там з хвіліны на хвіліну пачнуцца грандыёзны канцэрт і ўручэнне Нацыянальнай літаратурнай прэміі. Яшчэ да пачатку песень і скокаў заўважаю хлопчыкаў і дзяўчынак, апранутых у прыгожыя нацыянальныя касцюмы, цікаўлюся пра іх настрой. Юлія Салдаценкава прыехала ў Шчучын разам з танцавальным калектывам «Усмешка» з горада Свіслач Гродзенскай вобласці. «Я танцую ўжо восем гадоўі – рок-н-рол, сучасныя танцы, вальс і паланэз. А сёння для гасцей свята мы выканаем лявоніху. Гледачоў чакае вельмі дынамічны і жыццярадасны нумар», – падзялілася васьмікласніца.
Пляцовак, дзе святочны настрой стваралі інструментальныя і танцавальныя ансамблі краіны, у Шчучыне было шмат. Што важна, імі вельмі цікавіліся самыя юныя гледачы. Так, перад дзецьмі і моладдзю «ажывалі» знакамітыя пісьменнікі і паэты – Эліза Ажэшка, Цётка, Максім Багдановіч... Дзверы адчынілі тэматычныя мастацкія, кніжныя, персанальныя выставы, школьнікі з задавальненнем удзельнічалі ў літаратурных і музычных конкурсах.
У Дзень беларускага пісьменства сустрэць натоўп моладзі можна было і каля кніжных гандлёвых радоў. Рабяты ўсе як адзін шукалі добрыя і цікавыя кнігі. І, вядома, знаходзілі. Гэта было нескладана, бо Шчучын уздоўж і ўпоперак абстаўлены рознымі павільёнамі, дзе багаты выбар выданняў на любы густ. Тым больш кожны госць свята мог не толькі пачытаць свежыя нумары газет і часопісаў, але і пагутарыць з іх аўтарамі – журналістамі і рэдактарамі.
Дарэчы, свята беларускага слова назаўжды застанецца як у памяці яго гасцей, на іх кніжных паліцах, так і ў абліччы Шчучына, літаратурнай сталіцы гэтага года.
Афiцыйна
Намеснік кіраўніка Адміністрацыі Прэзідэнта Ігар Бузоўскі высока ацаніў падрыхтоўку XXII Дня беларускага пісьменства, працу арганізацыйнага камітэта, будаўнікоў, мясцовай улады. Іх сумесныя намаганні дазволілі прыцягнуць належную ўвагу да гісторыі і вядомых асоб Шчучына, зрабіць раённы горад сапраўднай літаратурнай сталіцай. Мясцовыя жыхары будуць з задавальненнем наведваць абноўленую бібліятэку імя Цёткі, новы кніжны магазін, адрэстаўраваную княжацкую сядзібу, сказаў ён.
Таксама Ігар Бузоўскі адзначыў, што мову, культуру і пісьменнасць можна назваць ахоўнай граматай беларускай дзяржаўнасці: «Гэта падмурак, на якім грунтуецца развіццё нашага грамадства. Захаваць і памножыць – наш святы абавязак». 6 верасня ў Шчучыне Ігар Бузоўскі прыняў удзел у цырымоніі адкрыцця пасля рэканструкцыі палаца Друцкіх-Любецкіх, азнаёміўся з выставачнымі павільёнамі, зачытаў віншаванне Прэзідэнта, накіраванае ўдзельнікам і гасцям урачыстасцей XXII Дня беларускага пісьменства.
Што вы лічыце самым яркім момантам свята?
Луіза Куц, 8 гадоў, Гродна:
– Я займаюся народнымі танцамі толькі тры гады, таму для мяне выступленне на такой вялікай сцэне ў навіну. Тут столькі гледачоў, што і палічыць складана. І ўсе яны чакаюць ад нас ідэальнага выступлення. Добра, што побач мае сябры – калі мы разам рэпеціруем, хваляванне адразу знікае. Вядома, падтрымлівае мама. Думаю, гэта будзе для мяне добрым вопытам, і надалей я выступлю яшчэ не на адным нацыянальным свяце.
Дар’я Дзiкевiч, 16 гадоў, Шчучын:
– Мы з сястрой Лерай з раніцы да ночы ходзім па горадзе і зусім не пазнаём родныя вуліцы. Будынкі прыкметна папрыгажэлі, змяніліся. Асабліва цэнтр Шчучына – ён стаў вельмі акуратным і ўтульным. А колькі гасцей, новых асоб! Радасна, што такое маштабнае свята праходзіць менавіта ў нас, і памяць аб гэтым захаваецца надоўга. Гэта вельмі каштоўны падарунак раённаму цэнтру.
Сяргей Радыёнiк, 20 гадоў, Гродна:
– Я студэнт, таму часта сумяшчаю адпачынак з магчымасцю падзарабіць. Прыемнае з карысным, як гаворыцца. Вось і зараз на свяце не проста гуляю, а гандлюю сувенірамі. Праца не пыльная, тым больш мой прылавак побач са сцэнай. Слухаю цудоўныя беларускія песні, гляджу выступленні артыстаў, а калі пакупнікоў няма, чытаю кнігу – набыў тут жа, у адным з тэматычных павільёнаў. Словам, выхадныя праходзяць насычана. У наступным годзе абавязкова паеду на чарговы Дзень пісьменства.
Ілля Снабко, 18 гадоў, Слонім:
– На свята прыехаў з сябрамі. У Шчучыне не быў усяго год, але, убачыўшы горад зноў, вельмі здзівіўся. Тыя ж вуліцы, тыя ж будынкі, але ў іх быццам удыхнулі новае жыццё. Нават не думаў, што некалі зусім непрыкметны дом можа выглядаць такім яркім і дагледжаным. І што важна, людзі ў Шчучыне ўсе як адзін шчаслівыя. Паглядзіце вакол: вы ўбачыце сумны твар? Не. Думаю, такі выдатны настрой жыхароў і гасцей горада – самы вялікі «дзякуй» святу.
Алеся Ляцкая, 21 год, Ваўкавыск:
– На такіх святах я яшчэ ніколі не была, таму Дзень беларускага пісьменства ў Шчучыне пакіне глыбокі след у маёй памяці. Не думала, што ў глыбінцы можна так весела правесці час. Мы і спявалі, і танцавалі, і пакаштавалі некалькі страў нацыянальнай кухні. Цяпер пойдзем у горад майстроў – мама замовіла прывезці са Шчучына сувеніры для ўсёй сям’і. Тата уручыў цэлы спіс літаратуры: крыху пазней пойдзем па кніжных гандлёвых радах – будзем папаўняць паліцы хатняй бібліятэкі.
ypopko@bk.ru,
Фота Віталія ПІВАВАРЧЫКА, БелТА
Фота Віталія ПІВАВАРЧЫКА, БелТА