З усёй Брэстчыны ў Высокае Камянецкага раёна завіталі лепшыя хлебаробы. Фестываль-кірмаш працаўнікоў сяла «Дажынкі-2018» сабраў тысячы гасцей. Брэсцкая вобласць першай у краіне падвяла вынікі ўборкі ўраджаю і аддзячыла рупліўцаў хлебнай нівы. Будаўнікі пастараліся, каб Высокае прымала свята ўтульным і адноўленым. Адрамантаваны дзясяткі будынкаў, дарогі, тратуары. Другое дыханне атрымалі аб’екты сацыяльнай сферы: Цэнтр дадатковай адукацыі дзяцей і моладзі, дзіцячы сад, гарадскі Дом культуры. Адноўленай сустрэла сваіх вучняў дзіцячая музычная школа. Капітальна адрамантавана гарадская бальніца. У горадзе з’явілася цэнтральная плошча, якой раней папросту не было.
Менавіта на ёй адбыліся галоўныя ўрачыстасці — ушанаванне пераможцаў абласнога спаборніцтва на жніве, канцэрт лепшых калектываў мастацкай самадзейнасці Брэстчыны. Паблізу працавалі гандлёвыя рады, майстар-класы давалі народныя ўмельцы.
Старшыня Брэсцкага аблвыканкама Анатоль Ліс адкрыў хлебаробскае свята:
— Працаваць нашы людзі ўмеюць з поўнай аддачай. Прыклад гэтага — цяперашняя ўборачная кампанія, якая стала сур’ёзным экзаменам для аграрыяў. І нашы хлебаробы дастойна справіліся са складанай задачай. Па ўраджайнасці збожжа мы не выйшлі на ўзровень мінулых гадоў, калі атрымлівалі па 36 цэнтнераў зерня з кожнага гектара, тым не менш вынікі гэтага сезона дастойныя. Пры ўраджайнасці 29 цэнтнераў з гектара — а гэта лепшы вынік сярод абласцей — намалочана 930 тысяч тон збожжа. З кукурузай мы маем ужо больш за 950 тысяч тон.
Лепшыя кіраўнікі сельгаспрадпрыемстваў Брэстчыны па выніках 2017 года.
Анатоль Ліс уручыў узнагароды пераможцам абласнога спаборніцтва за дасягненне высокіх вынікаў на ўборцы ўраджаю. Сярод раёнаў лепшымі прызнаны Лунінецкі, Маларыцкі і Столінскі, якія падзялілі першае, другое і трэцяе месца на п’едэстале «Дажынак-2018». Узнагароды ад імя хлебаробаў прымалі старшыні райвыканкамаў — Аляксандр Пачко, Мікалай Шум і Рыгор Пратасавіцкі.
Затым на святочную сцэну выходзілі кіраўнікі сельгаспрадпрыемстваў, якія дасягнулі найлепшых вынікаў на ўборцы збожжа, камбайнеры, вадзіцелі, занятыя на адвозцы ўраджаю, галоўныя аграномы гаспадарак і іншыя спецыялісты. Яны атрымлівалі ўзнагароды Брэсцкага аблвыканкама, Міністэрства сельскай гаспадаркі і харчавання Беларусі, Белкаапсаюза і іншых ўстаноў і арганізацый.
Уборачная кампанія стала сур’ёзным экзаменам для аграрыяў, і нашы хлебаробы годна справіліся са складанай задачай.
Віншуючы герояў хлебнай нівы, старшыня праўлення Белкаапсаюза, упаўнаважаны Прэзідэнта па Брэсцкай вобласці Валерый Іваноў падкрэсліў, што лепшы ў рэспубліцы вынік па ўраджайнасці зерневых і зернебабовых культур, які атрыманы на Брэстчыне, сведчыць аб многім:
— Вы зрабілі ўсё, што было магчыма ў няпростых умовах, каб атрымаць важкі ўраджай. Упэўнены, наперадзе толькі лепшыя вынікі!
У ГЭТЫМ, дарэчы, не сумняваецца старшы камбайнер ААТ «Камароўка» Брэсцкага раёна Аляксандр Юшчук, які ў абласным спаборніцтве перамагае ўжо некалькі гадоў запар. Сёлета ён убраў 427 гектараў плошчаў і намалаціў 1819 тон зерня, заняўшы першае месца. Самае галоўнае, па словах перадавога механізатара, не толькі вырасціць хлеб, але і ўбраць яго ў аптымальны тэрмін, надзейна падрыхтаваць камбайн. Тады і намалот будзе высокім.
На прасторнай сцэне «Дажынак-2018» у Высокім заслужаныя ўзнагароды атрымалі камбайнеры Сяргей Бурак з ААТ «Жарабковічы» Ляхавіцкага, Аляксандр Кіндрук з ААТ «Дварэцкі» Лунінецкага раёнаў. Баранавіцкае ААТ «Крошын» дэлегавала на ўрачыстасць адразу пяцярых механізатараў — Аляксандра Рагузіна, Паўла Махахея, Ігара Гаўрыка, Андрэя Шыманца, Рамана Тукая. Усе яны сталі пераможцамі, а галоўны інжынер гаспадаркі Дзмітрый Рачэўскі прызнаны лепшым у сваёй прафесіі.
Выдатных вынікаў дасягнулі вадзіцелі Мікалай Траяновіч, Віктар Палуян, Васіль Сташэўскі з ААТ «Птушкафабрыка «Дружба» Баранавіцкага, Анатоль Турчык з ААТ «Снітава-Агра» Іванаўскага, Дзмітрый Савосін з ААТ «Вазнясенскі» Жабінкаўскага раёнаў. Мікалай Траяновіч на аўтамабілі ГАЗ-САЗ перавёз амаль паўтары тысячы тон збожжа. На ўмоўную транспартную адзінку ў яго атрымалася 4330 тон. СВЯТА ўраджаю працягвалася да позняй пары. Яго ўдзельнікаў запрашалі праявіць таленты ў шматлікіх конкурсах, пачаставаць смачных патраў, сфатаграфавацца на памяць ва ўтульных сялянскіх падворках. Стала вядома, што чарговыя абласныя «Дажынкі» прымуць Ружаны, што ў Пружанскім раёне. Такім чынам, на Брэстчыне будзе працягнута пачатая летась традыцыя — праводзіць свята ўраджаю ў малых гарадах і значна паляпшаць якасць жыцця мясцовага насельніцтва.
Дарэчы, урачыстасці ў дзень «Дажынак» прайшлі не толькі ў Высокім, але і ў іншых населеных пунктах Камянецкага раёна. У Доме культуры аграгарадка Відамля ўшанавалі лепшых кіраўнікоў сельгасарганізацый і перапрацоўчых прадпрыемстваў аграпрамысловага комплексу Брэсцкай вобласці. Узнагароды ім уручылі першы намеснік старшыні Брэсцкага аблвыканкама Мікалай Токар і выканаўчы дырэктар абласнога аграпрамсаюза Сяргей Ашмянцаў. Сярод пераможцаў абласнога конкурсу — дырэктар ААТ «Астрамечава» Брэсцкага раёна Алег Бурак, старшыня маларыцкага СВК «Дарапеевічы» Васіль Юхімук, дырэктар ААТ «Ляхавіцкае-Агра» Іванаўскага раёна Уладзімір Марковіч, іншыя кіраўнікі.
Старшыня Брэсцкага абласнога аграпрамсаюза Міхаіл Страпко адзначыў, што ўшаноўваць лепшых кіраўнікоў аграрнай галіны ў дзень святкавання «Дажынак» на Брэстчыне стала добрай традыцыяй.
Слова – удзельнікам «Дажынак» на Брэстчыне
Андрэй ШЫМАНЕЦ, старшы камбайнер ААТ «Крошын» Баранавіцкага раёна:
— Свята ўраджаю мяне прыемна ўразіла. Каб пабываць на ім, варта было добра папрацаваць. Сёлета намалаціў 2498 тон зерня, заняў трэцяе месца ў абласным спаборніцтве. Высокае спадабалася ідэальнай чысцінёй, утульнымі вуліцамі, бясконцымі шэрагамі гандлёвых палатак, гаспадары якіх гасцінна запрашалі. Спадабаўся канцэрт, які прайшоў на галоўнай сцэне.
Віталь МАЛАХВЕЙ, вадзіцель ААТ «Астрамечава» Брэсцкага раёна:
— Ураджай убралі ў кароткі тэрмін. На аўтамабілі ГАЗ-САЗ я перавёз 1052 тоны зерня. Мог бы і болей, ды жніво хутка скончылася. Калі паведамілі, што ў абласным першынстве сярод маладых вадзіцеляў заняў другое месца, было вельмі прыемна і разам з тым нечакана. «Дажынкі» ў Высокім мне асабіста запомняцца надоўга. Цырымонія ўзнагароджання, канцэрт, новыя знаёмствы. Цудоўна, што ў краіне ёсць такая слаўная традыцыя — ушаноўваць хлебаробаў.
Вячаслаў КАШТАЛЬЯН, дырэктар ААТ «Агра-Моталь» Іванаўскага раёна:
— Зусім нядаўна мы адзначалі Дзень беларускага пісьменства ў Іванава. Цудоўнае свята, шмат знаёмстваў, уражанняў, успамінаў. Такія ж пачуцці ў мяне асабіста застаюцца і ад «Дажынак» у Высокім. Хлебаробы гэтае свята заслужылі. У надзвычай складаных умовах яны спачатку вырасцілі, а затым якасна ўбралі ўраджай. І зараз працягваюць шчыраваць у полі, на фермах, каб у кожнай хаце, на кожным стале быў дастатак.
kurets@sb.by
Фота аўтара і Святланы КІСЛАЙ