Ідэя праводзіць фестываль традыцыйнай культуры на Палессі ўзнікла ў Аляксандра Лукашэнкі падчас наведвання Прыпяцкага рэгіёну. Ён ініцыяваў Дзяржаўную праграму па развіцці Прыпяцкага Палесся на 2010—2015 гады, і правядзенне фестывалю стала адным з яе пунктаў. На мэце гэтага мерапрыемства не толькі падкрэсліць самабытнасць і ўнікальнасць рэгіёну ў культурных і этнічных адносінах, але і прыцягнуць у гэты куточак Палесся інвестараў і турыстаў.
Песні, прыпеўкі, народныя абрады, сакавітая палеская мова, вышываныя і тканыя ўборы, вырабы з лазы і дрэва, духмяныя дранікі і засмажанае парася, мочаныя яблыкі з бочкі і мёд у калодах... Чаго толькі ні сустрэнеш падчас фестывалю “Кліч Палесся”. Творчыя, умелыя і гасцінныя палешукі з Гомельскай і Брэсцкай абласцей стараюцца паказаць гасцям усе бакі сваёй унікальнай і часам дзіўнай, асабліва для гарадскога жыхара, культуры. Хто б мог падумаць, што ў ХХІ стагоддзі збіраюць мёд з борцяў і пераплываюць раку на самаробных чаўнах?! Для палешукоў з глыбінкі гэта і па сёння — неад’емная частка жыцця.
З кожным годам фестываль “Кліч Палесся” абрастае новымі мерапрыемствамі. Сёлета ў Ляскавічах упершыню адбудзецца цырымонія ўручэння памятнага знака “Ганаровы паляшук”, гашэнне паштовай маркі. Плануецца правядзенне конкурсу “Прыгажуня Палесся”, фотавыставы “Славутыя палешукі”, конкурсу маладой сям’і і свята ручніка.
