Дзякуючы новаму метаду можна эфектыўна вырашаць праблему зніжэння ўраджаю сельгаскультур.
Насельніцтва нашай планеты няўмольна павялічваецца: калі яшчэ ў 2011 годзе на зямлі пражывала каля 7 млрд чалавек, то мяркуецца, што да 2024 года гэтая лічба перасягне мяжу ў 8 млрд. Ежа жыццёва неабходна кожнаму з нас, таму забеспячэнне насельніцтва харчаваннем — адна з асноўных задач, якая стаіць перад усімі краінамі. Сельская гаспадарка інтэнсіўна развіваецца, адсюль і негатыўныя наступствы: парушаецца севазварот, пагаршаецца фітасанітарны стан глебы, у грунце зніжаецца колькасць пажыўных рэчываў, неабходных для здаровага развіцця раслін. Сельгаскультуры становяцца больш успрымальнымі да розных захворванняў. Штогадовыя сусветныя страты ўраджаю сельгаскультур налічваюць некалькі дзясяткаў мільярдаў долараў. Гібель раслін з-за хвароб адбываецца ў 13—16 выпадках са 100.
Што тычыцца нашай краіны, то кліматычныя ўмовы спрыяльныя для развіцця больш за 65 відаў насякомых-шкоднікаў і больш за 100 розных хвароб сельгаскультур. Прычым гінуць культуры як ва ўмовах адкрытага грунту, так і закрытага. Чаму, тлумачыць вучоны сакратар Інстытута мікрабіялогіі НАН Анастасія Сідарэнка:
— Асноўная прычына страты ўраджаю сельгаскультур ад розных хвароб — несвоечасовае выяўленне і няправільная ідэнтыфікацыя патагена. Калі мы не ведаем, які мікраарганізм выклікаў захворванне, вельмі складана правільна падабраць эфектыўныя сродкі абароны. А іх прымяненне на позніх стадыях, калі захворванне ўжо мае масавы характар або пашкоджана ўся расліна, не прыносіць жаданага выніку.
Традыцыйная дыягностыка ўзбуджальнікаў хвароб раслін, на жаль, не адрозніваецца высокай дакладнасцю. Часцей за ўсё спецыяліст разглядае расліну і вывучае сімптомы захворвання, на падставе якіх і ставіць «дыягназ». Ёсць іншы спосаб: частка расліны, пакалечаная хваробай, змяшчаецца ў спецыяльнае пажыўнае асяроддзе. Там вытрымліваецца некалькі дзён ва ўмовах, спрыяльных для росту патагена. Такім чынам можна атрымаць мікраарганізм, які выклікаў захворванне, вывучыць яго ўласцівасці і ідэнтыфікаваць. Але гэта працяглы працэс — можа спатрэбіцца некалькі тыдняў. Да таго ж і ў гэтым выпадку можна памыліцца. У дыягностыцы патагенаў раслін у краінах СНД і ў нас выкарыстоўваецца досыць дакладны метад — імунаферментны аналіз, аднак ён таксама мае шэраг мінусаў. Напрыклад, дарагоўля з-за прымянення імпартных рэагентаў.
— У сучаснай медыцыне набірае папулярнасць ДНК-дыягностыка. Яна мае шэраг важкіх пераваг, — тлумачыць дацэнт Анастасія Сідарэнка.
Гэты падыход вырашылі ўкараніць і для праблем сельскай гаспадаркі. Вучоным Акадэміі навук спатрэбілася тры гады, каб распрацаваць спосаб ПЦР-дыягностыкі (палімеразная ланцуговая рэакцыя. — Заўв. аўт.) для вызначэння бактэрыяльных і грыбных узбуджальнікаў хвароб сельгаскультур. Зрабілі арыгінальныя праймеры і падабралі ўмовы правядзення ПЦР, якія дазваляюць выявіць наяўнасць і вызначыць від патагенных мікраарганізмаў.
У распрацоўкі шмат плюсаў. Напрыклад, высокая адчувальнасць аналізу — спецыялісты могуць выяўляць нават невялікую колькасць патагенаў, што важна для ранняй дыягностыкі захворвання раслін. Высокая прадукцыйнасць дазваляе прааналізаваць шмат узораў за адзін раз. Акрамя таго, у адной рэакцыі можна праверыць прысутнасць некалькіх патагенаў, якія выклікаюць захворванні з падобнымі сімптомамі. Неверагодная дакладнасць — вучоныя могуць выразна ідэнтыфікаваць від мікраарганізмаў. І хуткі вынік — аналіз займае ўсяго 1—2 дні!
Кандыдат біялагічных навук Анастасія Сідарэнка дадае:
— Таксама намі распрацаваны метады вылучэння мікробнай ДНК з пашкоджаных раслін, насення, глебы, вады, пажыўнага раствору. Гэта дазваляе працаваць непасрэдна з матэрыялам, пазбягаючы лішніх стадый атрымання і вырошчвання патагена. Можна хутка вызначыць, ці ёсць там узбуджальнік захворвання, а таксама ўстанавіць крыніцу інфекцыі.
Дарэчы, распрацаваны спосаб ДНК-дыягностыкі можна ўжываць нават тады, калі сімптомы захворвання расліны яшчэ няярка выяўлены. Такога «бонусу» ў традыцыйных спосабаў няма. Яго можна выкарыстоўваць і для праверкі насеннага матэрыялу.
Распрацоўка ўжо на фінішнай прамой. Апрабацыя новага метаду пачнецца ў наступным годзе. Навінка можа быць карыснай для самай шырокай аўдыторыі: ад спецыялістаў буйных агракамбінатаў да фермераў і простых дачнікаў. Анастасія Сідарэнка:
— Ужыванне найноўшага ПЦР-вызначальніка дазволіць праводзіць хуткую і дакладную дыягностыку бактэрыяльных і грыбных узбуджальнікаў хвароб сельскагаспадарчых раслін. А гэта дапаможа эфектыўна змагацца з захворваннямі, зніжаць страты ўраджаю, забеспячваць устойлівае развіццё аграэка- сістэм.
ypopko@sb.by