Ансамбль “Каданс” з Віктарам Сазонавым перад выступамТворчыя калектывы, салісткі беларускай суполкі з радасцю прынялі прапановы адміністрацый Волжскага, Кіраўскага, Савецкага і Чыгуначнага раёнаў Самары: выступіць у канцэртных праграмах. І ўжо 12 лютага вакальны ансамбль “Каданс” выступіў перад жыхарамі вуліцы Сярэдне-Садовай №3. А ў апошні дзень Масленіцы (гэта даравальная нядзеля) у пасёлку Яблоновый овраг Волжскага раёна Самары выступаў беларускі вакальны дуэт: Марына Кірылава і Вераніка Кузняцова. Тым часам на святочнай пляцоўцы ў гандлёвым цэнтры “Гуд’Ок” у Чыгуначным раёне беларусаў прадстаўлялі юныя вакалісткі Ксенія Гуськова, Анастасія Бындава ды іх педагогі Наталля Ганчарова і Святлана Барсукова. Яшчэ ў пасёлку Смышляевка Кіраўскага раёна і парку “Дружба” Савецкага ўнутрыгарадскога раёна выступаў гурт “Каданс”: Анастасія і Лізавета Гуркіны, Арына Камісарава, Алена Нагорнава ды мастацкая кіраўніца гурта Іна Сухачэўская. Гледачы дружна падпявалі дзяўчатам, бурна апладзіравалі.
Моладзевае аддзяленне суполкі беларусаў, якім кіруе Юлія Цяплянская, паўдзельнічала ў святочных гуляннях на плошчы імя В. В. Куйбышава, галоўнай у горадзе. Па традыцыі, самарскія беларусы былі актыўныя і ў народных забавах “бой на падушках” ды “гіравы атракцыён”. Дарэчы, прызёрамі там сёлета сталі намеснік кіраўніка моладзевага аддзялення Георгій Курмакоў і дырэктар суполкі Аляксандр Патанейка. Малайцы! Дружнай камандай беларусы перацягвалі канат, затым з песнямі вадзілі карагоды, правяралі свой спрыт у розных гульнях. А завяршылася Масленіца спаленнем пудзіла Зімы. І хоць на вуліцах у Самары яшчэ снежна, ды Зіма ж, паводле народных звычаяў, паступова сыходзіць, вызваляючы дарогу Вясне.
Голас Радзімы № 9 (3561), чацвер, 1 сакавіка, 2018 у PDF
