Праз тэрмінал можна будзе звязацца з цэнтрам прыёму-перадачы паведамленняў.У першым паўгоддзі колькасць зваротаў глухіх ў цэнтры прыёму-перадачы паведамленняў павялічылася на 10 працэнтаў, а гэта каля 775 выпадкаў. Дапамогу ім аказваюць па відэазванку, праз месенджары і сацыяльныя сеткі. Пакуль у краіне працуюць тры такія цэнтры: у Гомелі, Гродна і Мінску. У кастрычніку яны адкрыюцца ў Віцебску і Брэсце. У кожным цэнтры працуе па чатыры перакладчыкі.
— Спецыялісты спраўляюцца. Людзям з парушэннем слыху дапамога патрэбна не кожную хвіліну. Неабходнасць узнікае ў пэўных сітуацыях: пры паходзе да ўрача, у ЖЭС, на пошту і г.д. Акрамя таго, у цэнтрах прыёму-перадачы паведамленняў і ў прадстаўніцтвах таварыства сумесна працуюць 40 штатных спецыялістаў. Яны пры неабходнасці могуць выехаць да тых, хто патэлефанаваў. Тры спецыялісты — у Мінску, астатнія размеркаваны па абласных і раённых цэнтрах, — тлумачыць, як працуе цэнтр, начальнік аддзела арганізацыйна-масавай работы і рэабілітацыі Цэнтральнага праўлення ГА «Беларускае таварыства глухіх» Аляксандр Клімовіч.
Часцей за ўсё людзі з парушэннем слыху звяртаюцца па медыцынскіх пытаннях: заказаць талон да ўрача, растлумачыць словы доктара на прыёме.
Вадзім Ільеня. Перакладчык мовы жэстаў.— За працоўны дзень я магу прыняць каля 20—40 зваротаў, у выхадныя спакайней. Часам бывае, што ніхто не патэлефануе. Праўда, такое адбываецца вельмі рэдка. Звоняць і па начах. Аднойчы я, можна сказаць, прымаў роды па скайпе, — дзеліцца перакладчык мовы жэстаў Вадзім Ільеня. — У жанчыны пачаліся схваткі. Я супакоіў яе і выклікаў хуткую дапамогу.
Цяпер таварыства глухіх разам з чыгункай працуюць над новым дагаворам. Плануецца, што на экране інфармацыйна-даведачнага тэрмінала на вакзалах з’явіцца фірменны знак таварыства глухіх. Праз тэрмінал можна будзе звязацца са спецыялістамі цэнтра прыёму-перадачы паведамленняў.
— Беларуская чыгунка — аб’ект стратэгічнай важнасці. У яе закрытая ўнутраная лінія сувязі. Мы хочам забяспечыць доступ да паслуг перакладчыка мовы жэстаў напрамую, праз інфармацыйна-даведачныя тэрміналы БЧ, — дзеліцца планамі Аляксандр Клімовіч.
Каля 4 тысяч чалавек у грамадстве глухіх інваліды па ўзросту, таму навацыі трэба ўводзіць асцярожна і рабіць іх максімальна зразумелымі і даступнымі. Знак таварыства глухіх збіраюцца размясціць на галоўны экран інфармацыйна-даведачнага тэрмінала ў прыкметным месцы. Так, каб ніякіх «манеўраў» не спатрэбілася. Знайшоў вачыма знак таварыства, клікнуў — звязаўся з перакладчыкам мовы жэстаў па відэасувязі.
Часцей за ўсё людзі з парушэннем слыху звяртаюцца з медыцынскімі пытаннямі.Падчас II Еўрапейскіх гульняў працавала падобная паслуга: замежныя госці з парушэннямі слыху маглі атрымаць дапамогу праз службу 105 па відэазванку. Работнікі чыгункі накіроўвалі званок глухога ў цэнтр прыёму-перадачы паведамленняў.
— Безбар’ернае асяроддзе для людзей з парушэннем слыху — гэта нармальнае жыццё, у якім яны могуць працаваць, падарожнічаць, звяртацца па медыцынскую або бытавую дапамогу без праблем, — кажа Аляксандр Клімовіч. — Для гэтага ў нашай краіне ўжо шмат зроблена. Дамова з ГА «Беларуская чыгунка» на час Еўрапейскіх гульняў спрасціла паездку замежных гасцей з парушэннем слыху ў нашу краіну. Цяпер мы не хочам спыняцца. Эксперымент даў зразумець, што такая паслуга можа з’явіцца. Акрамя таго, цяпер шматлікія беларускія арганізацыі і кампаніі заяўляюць свой інтарэс у цэнтры прыёму-перадачы паведамленняў. Гэта радуе.
Неўзабаве знак Беларускага таварыства глухіх можа з’явіцца і на інфармацыйна-даведачных тэрміналах ААТ «АСБ Беларусбанк». Гэта дапаможа забяспечыць даступнасць фінансавых паслуг.
ЛІЧБА
У першым паўгоддзі на ўліку ў ГА «Беларускае таварыства глухіх» усяго па краіне было 9468 чалавек, з іх 9127 — інваліды па слыху.
