Французкі акцёр на два дні прамяняў багемны Парыж на ўтульны Мінск
Увечары 21 ліпеня самалёт з 66-гадовым артыстам на борце прызямліўся ў Нацыянальным аэрапорце. Каларытны пасажыр, натуральна, не змог застацца незаўважаным — легенду французкага кіно рассакрэцілі яшчэ на візавым кантролі. Зрэшты, уязныя дакументы ў нашу краіну яму не спатрэбіліся: Жэрар Дэпардзьё, як вядома, — грамадзянін Расійскай Федэрацыі. Пакуль артыст старанна ўсміхаўся журналістам і дэманстраваў фатографам пашпарт з адзнакай аб уездзе, пасол Беларусі ў Францыі Павел Латушка расказаў пра мэту візіту: “У планах — абмеркаванне здымак у фільме “Нармандыя — Нёман”, над вытворчасцю якога цяпер працуюць кіношнікі з Беларусі, Францыі і Расіі. Акрамя таго, Жэрар Дэпардзьё, які мае аграрны і рэстаранны бізнес, пажадаў асабіста азнаёміцца з сельскай гаспадаркай краіны і нашымі аграгарадкамі, пра якія шмат чуў”.
У пачатку ліпеня, напярэдадні Дня Незалежнасці, Жэрар Дэпардзьё наведаў парыжскае дыппрадстаўніцтва нашай краіны. Тады ж у гутарцы з Паўлам Латушкам акцёр адзначыў тую ўвагу, якая надаецца кіраўніцтвам Беларусі сферы эканомікі і сельскай гаспадаркі. У адказ пасол запрасіў легендарнага артыста ўбачыць беларускія агратурыстычныя аб’екты на свае вочы. Дэпардзьё адмаўляцца ад сардэчнага запрашэння не стаў. Артыст не толькі прыняў прапанову, але і вырашыў не зацягваць з візітам — узгадніць графікі і расклад удалося ў рэкордна кароткія тэрміны.
Праграма двухдзённага візіту атрымалася насычанай: увечары ў дзень прылёту артыст паспеў пабываць на выступленні дзяржаўнага акадэмічнага народнага аркестра імя Жыновіча, рассмакаваць нашы дранікі і настойку на журавінах (“Пальчыкі абліжаш! У Францыі такога няма!” — падзяліўся з намі артыст). Даспадобы госцю прыйшоўся і беларускі морс: дабаўкі патрабаваць не стаў, але затое папрасіў запакаваць яму бутэльку-другую з сабою.
Раніцай наступнага дня акцёр адправіўся ў Смалявіцкі раён на малочна-таварную ферму “Задомля” сельгаспрадпрыемства “Азярыцкі-Агра”. Паводзіў сябе артыст зусім як дзіця: жыва цікавіўся тэхналогіямі вытворчасці, распытваў пра бычкоў і кароў, кратаў салому, перапэцкаўся ў сухім малаку... Але ўбачаным застаўся задаволены:
— Беларусь нагадала мне маленькую Швейцарыю: тыя ж чыста ўбраныя бязмежныя палі, маленькія ўтульныя домікі, вельмі дастойная інфраструктура. Нават тэхналогіі, па якіх развіваецца сельская гаспадарка, падобныя. Яшчэ я заўважыў, што Беларусь мае ўсе рэсурсы для таго, каб стаць сырнай краінай. Вашы сыры могуць быць не горшыя, чым французкія. З улікам той колькасці малака, што ў вас ёсць, і жадання вучыцца вам не хапае толькі парачкі граматных тэхнолагаў. Пажадана французаў. Запусціце гэты працэс — і ўсё ў вас атрымаецца.
Пра Беларусь Дэпардзьё, як аказалася, ужо шмат ведае — чуў, бачыў, чытаў. А цяпер яшчэ і на ўласным досведзе пераканаўся:
— Я шмат чуў пра прыгажосць беларускіх краявідаў — яны сапраўды неверагодныя! Акрамя таго, усёй Еўропе вядомы высокі ўзровень вашай сельскай гаспадаркі. Нават у расійскім горадзе Саранску, дзе я цяпер жыву, я не бачыў настолькі тэхналагічных фермаў. Відаць, што Прэзідэнт надае шмат увагі развіццю аграпрамысловага комплексу.
— Мсье Дэпардзьё, а пра тое, каб перанесці ў Беларусь частку свайго бізнесу, вы не думалі?
— Як вінаробу і вытворцу віна мне гэта невыгадна: у Беларусі не тыя ўмовы для вырошчвання вінаграду. Але тут ёсць усё, што трэба для жыцця: цудоўная прырода, спакой, натуральнае малако, смачнае мяса і прыгожыя жанчыны — а што яшчэ трэба для спакойнай старасці? Так што, магчыма, пазней я абдумаю гэтую прапанову.
Пакуль артыст каменціраваў усё, што адбывалася вакол, работнікі фермы выстраіліся за аўтографам. Тут і без слоў зразумела, як яны былі рады знакамітаму госцю. Акцёр такога маштабу сюды яшчэ ніколі не прыязджаў, не хавала эмоцый Вольга Шымановіч, брыгадзір малочна-таварнай фермы “Задомля”:
— Мы не ведалі да апошняга, што прыедзе сам Дэпардзьё. Нам толькі сказалі, што сёння завітае дэлегацыя высокіх гасцей. Не здзівіліся: мы прымаем гасцей практычна кожны месяц. Убачылі акцёра — не прызналі спачатку. І толькі потым разгледзелі... Але ў зносінах аказаўся вельмі прыемным, добразычлівым. Нікому не адмовіў у аўтографе!
Дарэчы
Акцёр таксама пабываў на Кургане Славы пад Мінскам, дзе ўсклаў кветкі і ўшанаваў памяць загінулых у Вялікай Айчыннай вайне.
Прэзідэнт Беларусі Аляксандр Лукашэнка 22 ліпеня сустрэўся з вядомым французкім акцёрам і рэстаратарам Жэрарам Дэпардзьё.
Аляксандр Лукашэнка і Жэрар Дэпардзьё ў нефармальнай абстаноўцы паразмаўлялі на тэмы падтрымкі сельскай гаспадаркі ў сучасным свеце, развіцця тэхналогій па вырошчванні экалагічна чыстых прадуктаў харчавання. Былі таксама закранутыя магчымыя перспектыўныя праекты супрацоўніцтва Беларусі і Францыі ў галіне культуры і мастацтва.
Кіраўнік дзяржавы правёў для Жэрара Дэпардзьё кароткую экскурсію па тэрыторыі афіцыйнай рэзідэнцыі Прэзідэнта Беларусі “Азёрны” ў Астрашыцкім гарадку, азнаёміў з некаторымі ўзорамі беларускай сельскагаспадарчай тэхнікі, навучыў навыкам ручной касьбы.
Юльяна Леановіч
