С начала года содействие в трудоустройстве получили более 100 000 человек

Каб знайсці працу, у сярэднiм беларусу трэба сем месяцаў. У мінулым годзе на пошукі патрабавалася каля васьмі. Пра гэта расказала журналістам намеснік начальніка ўпраўлення палітыкі занятасці насельніцтва Мінпрацы і сацыяльнай абароны Алена Дакукіна на прэс-канферэнцыі, прысвечанай дасягненню мэт устойлівага развіцця (МУР) у сферы занятасці насельніцтва і матывацыі працы. 


Штогод у службу занятасці краіны звяртаюцца каля 200 000 чалавек. У гэтым годзе за дапамогай у дзяржаўныя цэнтры прыйшлі больш за 140 000, з іх садзейнічанне у працаўладкаванні атрымалі больш за 100 000. 

Колькасць вакансій у краіне расце, адзначаюць спецыялісты, як і попыт на працоўную сі­лу. На працягу года каля 80 000 вольных працоўных месцаў штодня прапаноўвае агульнарэспубліканскі банк вакансій. Дарэчы, сайт сталі наведваць часцей. Пошук працы праз інтэрнэт становіцца ўсё больш папулярным сярод суіскальнікаў. 

Падыходы да маніто­рынгу рынку працы апошнім часам перагледжаны, адзначыла Алена Дакукіна. Дру­гі год спецыялісты вызначаюць пе­ралік тэрыторый з напружанай сіту­ацыяй на рынку працы. У мінулым годзе ў гэты пералік трапілі 53 тэрыторыі — як раёны, так і гарады. Больш за ўсё такіх тэрыторый у Віцебскай і Магілёўскай абласцях. Аднак на працягу бягучага года на 80 працэнтах тэрыторый, якія трапілі ў спіс, як паказваюць маніторынгі, сітуацыя палепшылася. 

Менш за ўсё афіцыйна зарэ­гіс­траваных беспрацоўных у Мінску. А сярод абласцей самы нізкі ўзровень беспрацоўя на Міншчыне. Як адзначыла намеснік старшыні камітэта па працы, занятасці і сацыяльнай абароне Мінаблвыканкама Наталля Ігнатовіч, узровень зарэгістраванага беспрацоўя ў прысталічным рэгіёне сёння складае ўсяго 0,2 працэнта. Для параўнання: сярэдні паказчык па краіне — 0,3 працэнта. Сітуацыя на рынку працы характарызуецца павелічэннем колькасці працоўных месцаў. На аднаго беспрацоўнага прыходзіцца ўмоўна 12 вакансій. Годам раней было ўдвая менш. 

Адзін з зарэкамендаваўшых сябе варыянтаў вырашэння праблемы пошуку працы на Міншчыне — перасяленне з мэтай працаўладкавання. 

— Службы занятасці праводзяць працу з наймальнікамі ў іншым раёне, — расказала Наталля Ігнатовіч. — Заключаецца трохбаковы дагавор, і беспрацоўны разам з чле­намі сваёй сям’і, у тым лі­ку дзецьмі, пераязджае ў іншы раён, дзе яму пра­дастаўляюць жыллё (інтэрнат, кватэру ці дом). Толькі сёлета змянілі месца працы разам з месцам жыхарства 35 чалавек.

На Міншчыне ў гэтым годзе, як адзначыла прадстаўнік Мін­аблвыканкама, запланавана стварыць каля 7000 працоўных месцаў, у тым ліку высока­тэхналагічных. Ужо актыўна прапаноўваюць такія вакансіі наймальнікі ў Смалявіцкім і Барысаўскім раёнах.

kozlovskaya@sb.by