Минск
+9 oC
USD: 2.04
EUR: 2.26

Со следующего учебного года БГУ вводит цифровую зачетку

Залік адным клікам

У БДУ распрацаваны электронныя заліковыя кніжкі. Яны возьмуць на сябе функцыі, якія раней выконвалі заліковыя кніжкі на папяровым носьбіце. Гэта чарговы этап стратэгіі лічбавай трансфармацыі ўніверсітэта, пры якой не проста ўкараняюцца сродкі інфарматызацыі, а змяняюцца самі працэсы. Яны спрашчаюцца для ўсіх удзельнікаў сістэмы. Карэспандэнт «Р» даведалася падрабязнасці.

Новыя лічбавыя фарматы дакументаў дазваляюць эканоміць сродкі і аптымізаваць атэстацыйны працэс у БДУ.

Мяне, як лічбавага чалавека, ніколі не радавала неабходнасць дубліраваць адзнаку ў заліковую кніжку студэнта. Да таго ж гэтыя вечныя гісторыі з забытай залікоўкай... Без яе выкладчык не мае права прымаць іспыт. Добра, калі забыўся яе ў інтэрнаце ў Мінску, а калі ў бацькоў дома на іншым канцы краіны? А калі наогул згубіў? Гэта ж цэлая трагедыя. Таму пераход на электронныя заліковыя кніжкі наспеў даўно, — лічыць старшыня Савета па лічбавай трансфармацыі БДУ Юрый Варатніцкі.

Для чаго наогул патрэбна заліковая кніжка? Па-першае, яна дубліруе экзаменацыйную ведамасць. Аднак сёння існуюць аўтаматызаваныя сістэмы і электронныя базы даных, куды разам з экзаменацыйнай ведамасцю ўносяцца адзнакі. Па-другое, студэнт у заліковай кніжцы бачыць пастаўленую выкладчыкам адзнаку, ды яшчэ і бацькі могуць зазірнуць у яе і даведацца пра паспяховасць свайго дзіцяці. Аднак сёння ў БДУ рэалізавана сістэма асабістых кабінетаў. Навучэнец ці яго бацькі ў любы момант на ўнутраным альбо знешнім сайтах універсітэта могуць увайсці ў асабісты кабінет і ўбачыць усе адзнакі, выстаўленыя выкладчыкамі ў перыяд навучання.

Залікоўка таксама падшываецца ў асабістую справу студэнта. Аднак у яе ўжо зараз падшываецца вучэбная картка, якая раздрукоўваецца з электроннай базы даных і завяраецца дэканам. У залікоўцы была фатаграфія студэнта, каб у кагосьці не ўзнікла думкі здаць экзамен за таварыша. Гэта праблема вырашаецца проста. На экзамен студэнт будзе прыходзіць з пластыкавым студэнцкім білетам, у якім таксама ёсць фатаграфія. Ён вырабляецца на базе банкаўскай карткі. Ні змяніць, ні падрабіць яго нельга. Нарэшце, электронная заліковая кніжка з'яўляецца сродкам абароны ад магчымых злоўжыванняў, напрыклад спроб падправіць адзнаку. У электроннай базе даных адлюстроўваецца гісторыя ўсіх змяненняў адзнак.

— Усе гэтыя функцыі ўжо рэалізаваны. Засталося толькі адмовіцца ад папяровай залікоўкі, што мы і плануем зрабіць ужо ў наступным навучальным годзе.

Новыя лічбавыя фарматы дакументаў дазваляюць эканоміць сродкі і аптымізаваць атэстацыйны працэс у БДУ. Толькі ў гэтым годзе за кошт укаранення новых студэнцкіх білетаў на аснове міжнародных банкаўскіх карт універсітэт сэканоміў каля 40 тысяч рублёў. У бліжэйшы час планаванне работы выкладчыкаў, іх справаздачы аб выкананні вучэбных даручэнняў, журналы куратараў і іншыя дакументы будуць весціся толькі ў электронным выглядзе ў асабістых кабінетах выкладчыкаў на ўнутраным сайце БДУ.

Увядзенне электронных заліковых кніжак — гэта чарговы этап стратэгіі лічбавай трансфармацыі БДУ. У адрозненне ад традыцыйнай інфарматызацыі, яна дазволіць мадэрнізаваць змест адукацыі і тэхналогій навучання. Напрыклад, студэнты будуць выконваць пісьмовыя работы ў электронным выглядзе з абавязковай праверкай у сістэме «Антыплагіят». Для гэтага створаць агульнаўніверсітэцкі рэпазіторый дадзеных работ. Ён забяспечыць іх захаванасць і цэласнасць.

gorbatenko@sb.by
Полная перепечатка текста и фотографий запрещена. Частичное цитирование разрешено при наличии гиперссылки.
Заметили ошибку? Пожалуйста, выделите её и нажмите Ctrl+Enter
Фото: Павел ЧУЙКО
Загрузка...