«Метелица» и «Витовт» — попытка №2: после доработки машины снова тестируют на улицах Минска

Заход на другі круг

Гэтым летам у Мінску абкатвалі новую тэхніку: у пачатку чэрвеня на рэйкі стаў супертэхналагічны трамвай «Мяцеліца», крыху пазней на маршрут выйшаў гібрыдны аўтобус «Вітаўт». Мінула колькі месяцаў, і вось ужо карыстальнікі інтэрнэт-форумаў пытаюцца: куды знік транспарт новага пакалення? Карэспандэнт «Р» даведалася, якія праблемы спецыялісты выявілі падчас першай доследнай эксплуатацыі трамвая і гібрыднага аўтобуса, а таксама пра тое, ці гатовы «Мінсктранс» папоўніць свой парк новымі машынамі.

Гэты трамвай на 12 метраў даўжэйшы за звычайны, ім цяжэй кіраваць, але ў той жа час ён хуткасны, вельмі плаўны.

90 дзён на праверку

Сёлета на абкатку трамвай «Мяцеліца» выйшаў на пачатку лета, але з 9 верасня знік з маршруту. Пасажыры заперажывалі — не хацелася губляць такую камфортную і яркую машыну. Мікалай Гапановіч, дырэктар філіяла «Трамвайны парк» «Мінсктранса», супакойвае: тэрмін доследнай эксплуатацыі транспарту працягнулі яшчэ на 90 дзён.

— На гэтым тыдні ён вярнуўся на маршрут № 1 — будзе ездзіць ад ДС «Зялёны Луг» да плошчы Мяснікова. Як і кожная тэхніка, трамвай мае патрэбу ў дапрацоўцы: мы ўжо накіравалі на Stadler Minsk, дзе яго збіралі, ліст з пералікам усіх нюансаў і дамовіліся, што яшчэ 3 месяцы будзем тэсціраваць машыну, сачыць за яе працай. На працягу гэтага часу іх спецыялісты будуць прыязджаць да нас на базу і паміж зменамі ліквідуюць недахопы. Якія? Назаву некалькі самых відавочных: калі трамвай набірае вялікую хуткасць, вагон трохі калышацца — гэтага быць не павінна. Акрамя таго, у вячэрні і начны час на шкле з’яўляюцца блікі, што перашкаджае вадзіцелю. Ну і па электроніцы ёсць пытанні.

Разам з вагонаважатым Юліяй Танкевіч мы едзем на «Мяцеліцы». Трамвай-мара, як яго часта называюць, не едзе — плыве, ён сапраўды адрозніваецца ад сваіх «калег», прыпаркаваных у дэпо. Прыгожы салон, зручныя сядзенні і поручні, кандыцыянер і тэлеэкраны, камеры відэаназірання — адчуваеш сябе тут камфортна.

Юлія ТАНКЕВІЧ за рулём ужо 16 гадоў. 
— За рулём я ўжо 16 гадоў, — прытармазіўшы на прыпынку, распавядае Юлія. — Перш чым выйсці на маршрут на новай тэхніцы, стажыравалася ў дасведчанага вадзіцеля, які ўжо ездзіў на «Мяцеліцы», — ён усё расказваў, паказаў. Здавалася б, нічога складанага, але першы раз выязджаць было вельмі страшна, не ведала, як машына сябе павядзе. Гэты трамвай на 12 метраў даўжэйшы за звычайны, ім цяжэй кіраваць, але ў той жа час ён хуткасны, вельмі плаўны.

Юлія дасведчаным позіркам акідвае прыборную панэль, на якой шмат розных кнопак: у прыватнасці, адны адкрываюць дзверы, іншыя ўключаюць паваротнікі і фары. А па цэнтры вялікі экран — сэрца трамвая: на ім бачныя тэмпература ў салоне, стан рухавікоў.

— Такую машыну лепш ставіць на хуткасныя лініі, каб было менш прыпынкаў, — разважае вадзіцель. — Мы трамвай разганяем да 60 кіламетраў у гадзіну — так трэба, але ён можа ехаць значна хутчэй. Кіраваць вельмі камфортна, бачыце, тут сядзенне іншае, больш мяккае. Але невялікія мінусы таксама ёсць: з-за блікаў на шкле вельмі дрэнна відаць дарогу, асабліва калі цёмна ці, наадварот, у яркі сонечны дзень. Таму я езджу ў акулярах, каб не сляпіла вочы.

Самае галоўнае, што людзям гэты трамвай спадабаўся.

— У водгуках у інтэрнэце многія адзначаюць плаўнасць ходу, камфортнасць паездкі, вельмі задаволеныя, што ёсць кандыцыянер. Пытанне аб куплі «Мяцеліцы» па астаткавым кошце будзем вырашаць пасля ліквідацыі ўсіх недахопаў, — рэзюміруе Мікалай Гапановіч.

Самае галоўнае, што людзям гэты трамвай спадабаўся.

Другі шанц для «Вітаўта» 

Таксама ў сталіцы праходзіў тэсціраванне аўтобус з гібрыдным прывадам А420 — ён хадзіў два месяцы па маршруце № 147 «Малінаўка — Брылевічы». Гэтая машына павінна была заваяваць сімпатыі пасажыраў сваім незвычайным знешнім выглядам. Акрамя таго, сярод пераваг новага транспарту — эканомія
паліва і экалагічнасць. Зараз гэты аўтобус вярнуўся на завод вытворцы, дзе працуюць над яго ўдасканаленнем. Алег Быцко, дырэктар НТВЦ «Белкамунмаш», галоўны канструктар, прызнаецца: вопытная эксплуатацыя выявіла пэўныя недахопы.

— Справа ў тым, што паліўную эфектыўнасць замяраюць па еўрапейскім стандарце, па якім мы і праводзілі выпрабаванні на палігоне. Пасля іх атрымалі эканомію паліва на 28 працэнтаў у параўнанні з аўтобусамі з традыцыйным прывадам. У рэальных умовах эксплуатацыі мы гэтай лічбы не дасягнулі — эканомія атрымалася значна меншай, амаль у два разы. Пачалі аналізаваць, чаму так адбылося, і знайшлі шэраг нюансаў. Напрыклад, мы зрабілі слабы электрадынамічны тормаз, таму і страцілі паліўную эфектыўнасць. 

Гібрыдны аўтобус павінен эканоміць паліва на 28 працэнтаў, але пакуль гэтага паказчыка атрымаць не ўдалося.
citydog.by

Дарэчы, некаторыя вадзіцелі былі незадаволены канструкцыяй пярэдніх дзвярэй. У гэтага кузава ёсць асаблівасць: каб дзверы цалкам адчыняліся і зачыняліся, трэба трымаць руль прама, не выварочваць яго. У звычайных жа аўтобусах такога нюансу няма, давядзецца прывыкаць.

— За гэтыя два месяцы мы ўсе праблемы выявілі, выправілі і цяпер думаем, што 20-працэнтная эфектыўнасць атрымаецца дакладна, — прагназуе Алег Быцко. — Чаму так адрозніваліся лічбы першы раз? Пры выпрабаваннях на палігоне мы проста праехалі пэўны цыкл і паглядзелі, колькі выдаткавалі паліва. Не звярнулі ўвагі на тэхналагічныя моманты, якія ёсць у рэальнай эксплуатацыі. У бліжэйшыя дні мы зноў пратэсціруем машыну — без пасажыраў, толькі з баластам, але па гарадскім маршруце. Цалкам змадэліруем рух гібрыда і паглядзім, як ён сябе пакажа. А потым будзем размаўляць з «Мінсктрансам» наконт новага дагавора. У тым выпадку, калі там адмовяцца ад паўторных выпрабаванняў, знойдзем іншы горад. Яшчэ адзін такі аўтобус зараз працуе ў Слуцку — там фіксуюцца практычна тыя ж самыя праблемы, што і ў Мінску. Але 14 працэнтаў эканоміі ў Слуцку мы ўсё ж змаглі дасягнуць.

glushko@sb.by

Полная перепечатка текста и фотографий запрещена. Частичное цитирование разрешено при наличии гиперссылки.
Заметили ошибку? Пожалуйста, выделите её и нажмите Ctrl+Enter
Фото: Алексей МАТЮШ