Як мае быць
Гарадскі зяць свяжуе ў цешчы ладнага кабанчыка.
— Вой-воечкі, колькі сальца ды мяска! І як жа яго без крыўды падзяліць? — бядуе кабета.
— Як мае быць, — адказвае зяць. — Вам, цешча, — усе вантробы, цэлая галава і ўсе ножкі, а мне з жонкаю — толькі сцягенцы, паляндвічка ды сальца з мяскам са спіны…
Віктар ЛОЎГАЧ
г. п. Акцябрскі
Алергія
Нездаровіцца Савосю —
Нешта капае ўсё з носа.
А як чхаць Савось пачне,
То разоў мо дзвесце чхне.
«Будзь здароў!» ды «Будзь здароў!» —
Толькі й чуе ад сяброў.
— Што з табой? — сусед пытае,
Хоць пілюлі сам глытае.
— Я маніць, Ахрэм, не буду:
Алергія на прастуду!
Віктар РЭЧЫЦ
г. Івацэвічы
