ДВАНАЦЦАЦЬ маладых сямей з розных куткоў вобласці высветлілі ўчора ў вёсцы Малыя Алашкі Шаркаўшчынскага раёна, хто лепш гаспадарыць на зямлі. Пераможцу мясцовы райвыканкам прэзентаваў бычка.
Шчыра кажучы, якраз усе ехалі не за бычком, а паказаць людзям, што, шчыруючы на роднай зямельцы, можна зусім няблага жыць. Узяць сям’ю жывёлаводаў Віталя і Таццяны Лойка з аграгарадка Стасева Лёзненскага раёна. Акрамя асноўнай работы, яны трымаюць яшчэ дзвюх кароў, трох парасят, за два дзясяткі курэй, трусоў і розную іншую жыўнасць. Прызнаюцца, што падсобная гаспадарка не ў цяжкасць і даход з яе перавышае з месца асноўнай работы.
— Працуем спяваючы, — гэта дакладныя словы яшчэ адных канкурсантаў — Алены і Валерыя Скрага з аграгарадка Галубічы Глыбоцкага раёна.
Яна — начальнік мясцовага аддзялення сувязі, ён — сталяр. Не адзін канцэрт у мясцовым Доме культуры не абыходзіцца без іх удзелу. Маюць гектар зямлі, на якой разам з імі шчыруюць трое дзяцей, што не перашкаджае гаспадарам займацца творчасцю і, такім чынам, прэтэндаваць на перамогу ў спаборніцтве.
На гэты раз абласны конкурс праходзіў знамянальна і сімвалічна ў вёсцы Малыя Алашкі. Менавіта тут сусветна вядомы садавод Іван Сікора вывеў адных яблынь звыш паўтысячы сартоў і тым самым паказаў, як можна добра гаспадарыць на роднай зямлі.
І таму нездарма ўдзельнікі абласнога конкурсу “Уладар сяла” спачатку наведалі два музеі Івана Сікоры, будынкі, дзе ён жыў, і нават змаглі паглядзець дакументальную стужку студыі “Беларусьфільм”, як Іван Сікора з педагогамі мясцовай школы і вучнямі збірае багаты ўраджай яблыкаў.
Магчыма, таму сёлетні конкурс найбольш набліжаны да зямлі. Тут не толькі трэба было паказаць, як хутчэй распілаваць кругляк дроў, перабраць бульбу, запрэгчы каня, лепш выступіць з мастацкім нумарам, але і ўпершыню мужчынам даказаць майстэрства завіхацца са звычайнай касой, а жанчынам — спячы дранікі на... калодзе.
Перамогу святкавала сям’я Сяргея і Юліі Адамовічаў з аграгарадка Ржаўка Бешанковіцкага раёна.
saulich@bk.ru
Фота Алены АНАНІЧ
Фота Алены АНАНІЧ