Столичные универмаги открыли сезон предновогодней торговли

Ёлкі чакаюць пакупнікоў

Электрычную брытву — тату, набор бакалаў — маме, а малодшаму брату — машынку на пульце кіравання... У снежні шопінг традыцыйна ператвараецца ў «пакуты»: у чарзе па навагоднія падарункі (асабліва ў дні зніжак) можна прастаяць доўга. Але гэты перыяд немагчыма не любіць: гандлёвыя рады ўпрыгожаны яркімі гірляндамі, на вітрынах разгортваюцца цэлыя казачныя гісторыі, а паліцы магазінаў заклікаюць купіць чарговую сувенірную забаўку. Ці гатовыя нашы ўнівермагі да наплыву пакупнікоў і якім асартыментам здзівяць сёлета, даведалася карэспандэнт «Р».

Універмагі ўжо на ўсю моц прымаюць наведвальнікаў.

Універмагі ўжо на ўсю моц прымаюць наведвальнікаў. Да Новага года тут можна купіць штучныя ёлкі (коштам ад 30 да 300 рублёў) і заказаць эксклюзіўныя ёлачныя шары з любымі надпісамі і індывідуальнымі матывамі для роспісу. На працягу 20 хвілін мастачкі нанясуць на іх імя, пажаданне, упрыгожаць сямейным шаржам або прапануюць намаляваць прыгожы пейзаж.

Супрацоўнікі магазінаў кажуць, што ў якасці падарункаў людзі больш за ўсё купляюць парфумерна-касметычныя тавары, посуд, вырабы са шкла і сувеніры. Тут і зніжкі някепскія — даходзяць да 40 працэнтаў. Але варта разлічваць свой час: у сярэднім у дні акцый універмагі наведваюць ад 5000 да 20 000 пакупнікоў, а ў пераднавагоднія дні — удвая больш.

— У гэтым асенне-зімовым сезоне змяніліся падыходы да афармлення. Незвычайна ўпрыгожаны вітрыны, якія з’явіліся дзякуючы кааперацыі дэкаратараў з мастачкай Ганнай Сілівончык. За аснову матываў афармлення ўзяты сюжэты некаторых карцін беларускага майстра, да іх дададзены розныя тавары і навагодні антураж. Упрыгожванне вітрын — даволі затратная і працаёмкая справа, у гэтым годзе на стварэнне дэкору пайшло каля 40 000 рублёў, — расказала начальнік аддзела арганізацыі гандлю ГУМа Анжаліка Лысакоўская.

Дарэчы, ёлкі ў холе ўнівермага ў гэтым годзе не будзе — замест яе ў цэнтры залы з’явілася фотазона са слядамі Дзеда Мароза, каля якой можна загадаць жаданне. Яно абавязкова збудзецца.

Крысціна СКУРАТОВІЧ

Полная перепечатка текста и фотографий запрещена. Частичное цитирование разрешено при наличии гиперссылки.
Заметили ошибку? Пожалуйста, выделите её и нажмите Ctrl+Enter