Не вясельным генералам, а выпрабаваным гвардзейцам i сябрам у безлiчы жыццёвых i творчых бiтваў прыбыў у Вiцебск былы баявы афiцэр-«афганец», вядомы паэт i публiцыст, а сёння першы намеснiк старшынi грамадскага аб’яднання «Беларускi саюз журналiстаў» Рыгор Сакалоўскi. Ён прыняў удзел у рабоце выканкома Вiцебскай абласной арганiзацыi грамадскага аб’яднання «Беларускi саюз журналiстаў».
Справаздачу аб рабоце сродкаў масавай iнфармацыi беларускай поўначы зрабiў старшыня абласнога творчага саюза Уладзiмiр Раманоўскi. Сёння ў журналiсцкiм саюзе Прыдзвiнскага краю налiчваецца 220 «штыкоў».
Са шкадаваннем прамоўца заўважыў, што папаўненне творчай дружыны адбываецца недастаткова актыўна. А вось нядаўнi абмен членскiх бiлетаў ГА «Беларускi саюз журналiстаў» прайшоў у вобласцi бездакорна.
Мiнорным момантам мерапрыемства стала заява шматгадовага кiраўнiка журналiсцкага саюза Вiцебшчыны Уладзiмiра Раманоўскага аб зняццi з сябе паўнамоцтваў старшынi грамадскага аб’яднання. Важкi аргумент такога кроку — пагаршэнне стану здароўя, якое не дазваляе на ўзроўнi сучасных патрабаванняў спраўляцца з абавязкамi важака журналiсцкай дружыны.
З агульнай згоды членаў выканкома на пасаду новага кiраўнiка абласной арганiзацыi ГА «Беларускi саюз журналiстаў» вылучаны першы намеснiк начальнiка ўпраўлення iдэалагiчнай работы Вiцебскага аблвыканкома Пётр Гнуценка (па сумяшчальнiцтве з асноўнай работай). Гэта прафесiянальны журналiст, якi ўжо шмат год плённа працуе ў iдэалагiчным апараце абласной «вертыкалi». Пятру Гнуценку 48 гадоў. Ён добра ведае форму i змест дзейнасцi ўсiх СМI, карыстаецца аўтарытэтам у прафесiянальным асяродку.
Калегi цёпла павiншавалi новага лiдэра. Не менш прыемныя словы прагучалi i ў адрас Уладзiмiра Раманоўскага з уручэннем узнагарод ад кiраўнiцтва ГА «БСЖ» i вобласцi. Рыгор Сакалоўскi выказаў асаблiвае прызнанне ў сваiх сiмпатыях да вiцебскага краю, дзе многа гадоў таму назад ён праходзiў службу рэдактарам дывiзiённай газеты славутай 103-й дывiзii паветрана-дэсантных войск.
