Шнекаротарны снегаачышчальнік фарміруе сапраўдныя снежныя горы.
Снег на сваім месцы
Па інфармацыі дзяржаўнага вытворчага прадпрыемства «Гаррэмаўтадар Мінгарвыканкама», для складзіравання снегу, звезенага з гарадскіх вуліц, вызначана дзевяць палігонаў часовага захоўвання – сваю ўласную пляцоўку маюць амаль усе раёны горада, а таксама буйныя камунальныя арганізацыі, якія прымаюць актыўны ўдзел ва ўборцы снегу. Месцы для палігонаў абавязкова выбіраюць сумесна з эколагамі і калі не за межамі горада, то хаця б на пустках, аддаленых ад жылых дамоў і вадаёмаў. Справа ў тым, што разам са снегам на пляцоўку трапляюць соль, пясок, смецце, рэшткі нафтапрадуктаў.Снегу так многа, што на пад’ездах да палігона ўтварылася сапраўдная чарга з самазвалаў.
Палігон, дзе складзіруе прыбраны снег ДВА «Гаррэмаўтадар Мінгарвыканкама», знаходзіцца на вуліцы Будслаўскай мікрараёна Навінкі. Знайсці яго зусім лёгка нават без дакладнага адрасу: трэба проста рухацца за шарэнгай самазвалаў са снегам. Але для прагулак гэта месца непрыдатнае: снежная каша пад нагамі, перамолатая коламі, мае ўжо чорны колер, а выбіраючы больш сухое месца, каб ступіць, неабходна сцерагчыся вялізных, цяжкіх машын. Добра, што хуткасць іх тут невялікая: перш чым пазбавіцца ад грузу, самазвалам даводзіцца некаторы час пастаяць у чарзе.
Бульдозеры спыняюцца, толькі каб вызваліцца ад наліплага снегу.
Пляцоўка для часовага захоўвання снегу працуе кругласутачна і без выхадных – як і снегаўборачная тэхніка, і людзі, якія вызваляюць горад са снежнага палону. Палігон плошчай 24 000 квадратных метраў патрабуе пастаяннага нагляду і абслугоўвання. Проста так скінуць гурбу снегу тут нельга – толькі ў адведзеным месцы. Адгортваюць яго бульдозеры, шнекаротарны снегаачышчальнік фарміруе сапраўдныя горы для эканоміі месца. На выездзе дыспетчар робіць адзнаку ў пуцявых лістах вадзіцеляў. Размаўляць нават няма часу – праца вядзецца няспынна.
Снежныя фантаны
Шнекаротарны снегаачышчальнік на шасі аўтамабіля «Урал» нагадвае гіганцкую мясарубку, валы якой, рухаючыся да цэнтра, разганяюцца да вялізнай хуткасці і пачынаюць літаральна ўгрызацца ў брудна-белыя гурбы, захопліваючы і здрабняючы іх. Пасля снег паступае ў выкідны патрубак і сапраўдным фантанам вылятае ў патрэбным кірунку.Кузавы выгружаюць у пэўным парадку.
Як паведаміў Уладзімір Латушкін, намеснік генеральнага дырэктара па ўтрыманні аб’ектаў добраўпарадкавання ДВА «Гаррэмаўтадар Мінгарвыканкама», у кругласутачнай уборцы горада звычайна задзейнічана каля 630 адзінак тэхнікі і 700 чалавек. У першую чаргу ў парадак прыводзяць магістральныя вуліцы, затым – другарадныя. Адначасова ачышчаюць прыпынкі грамадскага транспарту і пешаходныя пераходы. За 12-гадзінную змену палігон прымае ў сярэднім 500–600 рэйсаў спецтэхнікі – гэта каля 1000–1200 рэйсаў і не менш за 30 000 кубаметраў снегу за суткі.
Кіпіць праца і на астатніх пляцоўках, прызначаных для складзіравання снегу, – без яго гэтай зімой не застаўся ніхто.
Валы снегаачышчальніка захопліваюць і здрабняюць снежныя пласты, адначасова адпраўляючы іх на патрэбнае месца.
Дарэчы, яшчэ некалькі месяцаў пасля заканчэння зімы жыццё на такіх снежных палігонах працягваецца: ідуць работы па ўборцы смецця, якое прывезлі разам са снегам з гарадскіх вуліц, «падварушванні» бруднага панцыра, што ўтвараецца на паверхні гурбаў з іх раставаннем і перашкаджае пранікненню сонечных прамянёў, а таксама па рэкультывацыі.
nevmer@sb.by