Для тэатралаў падрыхтавалі насычаную і яркую праграму. Адкрые форум 13 снежня вясёлы спектакль у жанры оперы-буфа “Дон Паскуале” Гаэтаны Даніцэці ў пастаноўцы дырыжора Віктара Пласкіны. 15 снежня прыхільнікі опернага мастацтва пачуюць чароўнае сапрана адной з самых запатрабаваных оперных выканаўцаў сучаснасці Вольгі Перацяцька, за плячыма якой выступленні на сцэнах Венскай дзяржаўнай оперы, Op€era de Paris, Цюрыхскага опернага тэатра, Ла Скала ў Мілане, Каралеўскага тэатра ў Мадрыдзе, Вялікага тэатра Расіі і іншых вядучых оперных пляцовак свету. У Мінску Вольга прадставіць вялікую сольную праграму, якая ўключае творы Глінкі, Беліні, Расіні, Даніцэці, Вердзі і іншых кампазітараў.
У нядзелю, 16 снежня, у Вялікім тэатры дадуць оперу “Тоска” Джакома Пучыні. Партыю прыгажуні Флорыі выканае сербская дзіва Драгана Радаковіч, яе каханага — мастака Марыё — заслужаны артыст Расіі і народны артыст Татарстана Ахмед Агадзі. Яшчэ адзін шэдэўр Пучыні і адну з самых яркіх прэм’ер нашага Вялікага тэатра 2018 года — “Багему” ў пастаноўцы народнага артыста Расіі Аляксандра Ціцеля — пакажуць 17 снежня. Не абмінулі арганізатары форуму сваёй увагай і нашумелы спектакль “Саламея” Рыхарда Штраўса ў пастаноўцы Міхаіла Панджавідзэ. А завершыць форум 21 снежня гала-канцэрт, на які прыедуць выканаўцы з 15 краін, а таксама выступяць пераможцы Мінскага міжнароднага Каляднага конкурсу вакалістаў. Дырыжыраваць аркестрам у гэты вечар будзе народны артыст Беларусі Аляксандр Анісімаў.
mila@sb.by