Вось дык каву заварылi!

Фестываль кавы: якімі спосабамі ў Мiнску заварваюць гэты напой

Сёння зусім нядзіўна сустрэць на вуліцы мінака з кубачкам кавы. А колькі ў Мінску з'явілася кавярняў! Амаль на кожным вуглу. Карэспандэнт «Р» таксама не змагла адмовіцца ад духмянага напою і адправілася на вуліцу Кастрычніцкую, дзе з 15 па 22 мая праходзіць фестываль кавы. Чым жа здзіўляюць барыста? 

Барыста Дзмітрый ЯКІМАЎ не толькі гатуе каву для гасцей, а яшчэ і сам яе кожны дзень п’е: «Вельмі смачна!»

На пляцоўцы фестывалю кожны дзень з'яўляюцца новыя героі — барыста розных кавярняў, якія паказваюць гасцям розныя спосабы заварвання кавы, дзеляцца вопытам. Так, сёння два барыста кавярні Surf  Сяргей Галавач і Дзмітрый Якімаў рыхтуюць напоі на гатунках кавы, у смаку якіх адчуваецца чорны чай, мёд, шыпшына, сухафрукты і чорная парэчка, абрыкос, карамель і арэхі. Нечакана? Такімі смакамі валодаюць гатункі з Коста-Рыкі, Кеніі, Сальвадора і Руанды. Паспрабуем?

Фатограф выбірае з класічных напояў латэ, а мне, мабыць, падыдзе кава альтэрнатыўнага спосабу заварвання. На выбар прапануюць тры: аэрапрэс — густая і насычаная на смак, кемекс — лёгкая кава і «варонка» — з яркім і чыстым смакам. Выбіраю апошні варыянт. Дзмітрый дастае нейкія колбачкі, шалі, шкляначкі... 

Важна, каб пры падрыхтоўцы «варонкі» з кавы выйшаў вуглякіслы газ.

— Будзем рабіць з гатунка кавы з Кеніі. Узважваем для кубка порцыю зерняў — 18 грамаў — і адпраўляем іх у кавамолку. Затым возьмем сервер — гэта ёмістасць, у якой будзем заварваць каву, на яе ставім лейку, а ў яе ўкладваем папяровы фільтр. Ён патрэбны для таго, каб кава не адразу правалілася ў сервер, а акуратна працэджвалася, — дэталёва паказвае і расказвае Дзмітрый. — Падрыхтуем гарачую ваду — у дадзеным выпадку яе тэмпература 92 градусы — і намочым ёю фільтр. Навошта? Каб выдаліць папяровы смак у кавы, які яна можа набыць, праходзячы праз яго.

Пасля ў змочаны фільтр насыпаюць каву і заліваюць яе ўсяго 30 мілілітрамі вады. Тут наступае этап блумінгу: увесь вуглякіслы газ, што змяшчаецца ў каве, выходзіць і не перашкаджае далейшай экстракцыі. Затым раўнамерным струменьчыкам барыста вылівае 240 мілілітраў вады ў сервер, здымае варонку і як бы трасе ўсю ёмістасць, каб насыціць каву кіслародам. Вуаля! Доўга? Не, усяго 2,5 хвіліны.

Вось такую кававую «таблетку» загружаюць у кавамашыну.

— За дзень фестывалю мы зварылі каля двух кілаграмаў кавы — гэта прыкладна сто порцый напою, — Дзмітрый бярэ і бярэ заказы на новыя кубкі. — Заказваюць рознае: і альтэрнатыўныя спосабы заварвання, і ўсім даўно вядомыя — эспрэса, двайны эспрэса, капучына, флэт уайт, латэ. Іх мы робім з дапамогай кавамашыны.

Пакуль мне гатавалі каву, нашаму фатографу барыста Сяргей Галавач ужо падрыхтаваў латэ, прычым не просты, а з выявай нашай фірмавай літары — «Р». Як? Ён акуратна зверху «намаляваў» яе струменьчыкам кавы эспрэса. Барыста могуць адлюстраваць на напоях што душа пажадае.

А якую каву любіце вы?

Пакуль Дзмітрый робіць эспрэса для маладога чалавека, дзеліцца сваімі назіраннямі:

— Многія думаюць, што эспрэса — гэта моцная кава. Але гэта далёка не так. За 25 секунд працэсу яе падрыхтоўкі выдаляецца пэўная частка кафеіну, эфірных масел, якія робяць напой не моцным, а насычаным.

На фестывалях барыста не толькі паказваюць, што ўмеюць, але дзеляцца вопытам між сабой. Прафесійнае сяброўства

Дарэчы, а ці правільна я раблю на працы, заліваючы молатую каву простым кіпенем без усіх гэтых леек, вагаў і фільтраў?

— Чаму не? Такім чынам і дэгустуюць каву прафесіяналы — заліваюць кіпенем і спрабуюць, — супакойвае Дзмітрый. — А наогул як толькі каву не п'юць! Ёсць такая, якую робяць з халоднай вадой, настойваючы ажно 24 гадзіны. У Фінляндыі, напрыклад, сыр заліваюць кавай і затым ядуць яго лыжкай. Або вось: копі-лювак — самая дарагая ў свеце кава. Працэс вытворчасці зерня заключаецца ў тым, што звяркі мусангі ядуць плады кававага дрэва, ператраўліваюць іх, а затым... Зразумелі? Людзі гэтыя зярняткі збіраюць, мыюць і сушаць. Кажуць, напой з гэтага гатунку мае непаўторны смак.

Нашу фірмавую літару «Р» барыста Сяргей ГАЛАВАЧ зрабіў струменьчыкам эспрэса.

Не, дзякуй. Хопіць і гісторыі пра гэта. Мы ўжо выпілі смачнай кавы, пагутарылі і, здаецца, набраліся энергіі. Час нам закругляцца, бо ў барыста шмат працы.

— Мне, калі ласка, капучына, — робіць заказ госця фестывалю Кацярына Фралова. — Звычайна спрабую розныя гатункі і віды кавы, але сёння захацелася адчуць спалучэнне малака і кавы ў капучына. Ведаю, што гэтыя барыста адны з нямногіх у горадзе, хто робіць вось гэты напой ідэальна. Я правярала. 

Відаць, у нас сапраўды з’явіліся свае знатакі ды фанаты кавы і, канешне, спецыялісты, якім не ўсё роўна, што вы п’яце. 

alinakasel@gmail.com

1/
Фото: Павел ЧУЙКО
Фото: Павел ЧУЙКО
Фото: Павел ЧУЙКО
Фото: Павел ЧУЙКО
Фото: Павел ЧУЙКО
Фото: Павел ЧУЙКО
Фото: Павел ЧУЙКО
Фото: Павел ЧУЙКО
Фото: Павел ЧУЙКО
Фото: Павел ЧУЙКО
Фото: Павел ЧУЙКО
Фото: Павел ЧУЙКО
Заметили ошибку? Пожалуйста, выделите её и нажмите Ctrl+Enter
Автор фото: Павел ЧУЙКО
Версия для печати
Заполните форму или Авторизуйтесь
 
*
 
 
 
*
 
Написать сообщение …Загрузить файлы?