Хваробы брудных рук не драмаюць. Фота mazzdrav.ru
У гэтым годзе асноўная крыніца непрыемнасці — ротавірус. Захворванне вырасла на трынаццаць адсоткаў. Летам узбуджальнік больш жывучы, таму і праблемы, звязаныя з ім, узнікаюць часцей.
Загадчык супрацьэпідэміялагічнага аддзялення Рэспубліканскага цэнтра гігіены, эпідэміялогіі і грамадскага здароўя Дзмітрый Галоцік супакоіў:
— Сітуацыя ў краіне кантралюецца. Успышак у летніх аздараўленчых установах пакуль не зафіксавана. Не ўзнікала і ачагоў, звязаных з прадуктамі харчавання прамысловага вырабу і прадпрыемствамі грамадскага харчавання.
Захворванне бактэрыяльнымі інфекцыямі ў гэтым годзе знізілася. Сальманэлёзам, напрыклад, на 25%. Рэгіструюць адзінкавыя эпізоды дызентэрыі і брушнога тыфу. Брушны тыф — інфекцыя, якую пацыенты прывозяць з іншых краін.
Сярод дзяцей захворванне вострымі кішэчнымі інфекцыямі вышэй. У дарослых хвароба часта працякае ў скрытай форме. Лячэнне залежыць ад стану пацыента. У асноўным яно сімптаматычнае і накіравана на аднаўленне страчанай вадкасці.
Загадчык кішэчна-дыягнастычнага аддзялення Гарадской клінічнай інфекцыйнай бальніцы Вольга Глаз распавяла, калі патрабуецца шпіталізацыя:
— Пры станах сярэдняй ступені цяжкасці і цяжкіх патрэбна кваліфікаваная дапамога. У бальніцы праводзіцца абследаванне. Мы выяўляем на працягу некалькіх гадзін узбуджальнік. Прызначаем адпаведнае лячэнне.
Ёсць верагоднасць падчапіць заразу і пры купанні ў вадаёмах. Асабліва ў месцах, якія не адведзеныя для купання. Дзмітрый Галоцік перасцерагае:
— Вядзецца маніторынг не ўсіх вадаёмаў. У прыватнасці, тых, якія не прызначаныя для купання. Не варта лезці ў затокі і копанкі са стаячай вадой. Трэба сцерагчыся водных прастораў, дзе стаяць забараняльныя знакі. Пры купанні ваду не праглынаць. Пасля трэба прапаласкаць рот вадой, памыць рукі, абмыцца самому і абцерціся.
Загадчык аддзялення гігіены харчавання Рэспубліканскага цэнтра гігіены, эпідэміялогіі і грамадскага здароўя Вія Шукевіч нагадвае меры прафілактыкі, якія дазволяць абараніць сябе ад інфекцый у летні перыяд:
— Перш за ўсё гэта асабістая гігіена. Правілы старыя як свет: мыць рукі пасля вуліцы і прыбіральні. Падтрымліваць чысціню ў доме, чысціню посуду і абсталявання. Мыць садавіну і гародніну, у тым ліку і тую, што з лупінай, якую не ядуць. Трэба своечасова праводзіць барацьбу з грызунамі. Клапаціцца аб чысціні ўпаковачных матэрыялаў. Сачыць за тэрмінамі прыдатнасці і кантраляваць тэмпературу захоўвання. У дарогу лепш не браць прадукты, якія хутка псуюцца. Сыр, каўбасу, малочныя вырабы лепш перавозіць у сумцы-халадзільніку.
Вольга АНАТОЛЬЕВА
